ചങ്ങരംകുളം ചെറവല്ലൂർ ജൈവ വൈവിധ്യ പാർക്ക് കാട് മൂടി നശിക്കുന്നു

ചങ്ങരംകുളം:പെരുമ്പടപ്പ് പഞ്ചായത്തിലെ ചെറവല്ലൂർ കുടുംബാരോഗ്യ കേന്ദ്രത്തിനു സമീപത്തെ പാർക്കാണ് നാട്ടുകാർക്ക് പ്രവേശിക്കാൻ കഴിയാത്തവിധം കാട് മൂടിയത്, ഒരു വർഷം മുൻപ് ജൈവ വൈവിധ്യ ബോർഡ് 5 ലക്ഷം രൂപ ചെലവഴിച്ചു നിർമിച്ച പാർക്കാണ് ഉദ്ഘാടനം കഴിഞ്ഞതിനു ശേഷം തിരിഞ്ഞു നോക്കാതെ നശിപ്പിച്ചു കളയുന്നത്. അപൂർവമായ ഔഷധ ചെടികളും പാടശേഖരത്തിനു സമീപത്തെ ഫോട്ടോ പോയിൻ്റും ആദ്യ കാലങ്ങളിൽ നാട്ടുകാരെ ആകർഷിച്ചു. പുൽക്കാടുകൾ വളർന്നു ഇഴജന്തുക്കളുടെ ആവാസ കേന്ദ്രമായതോടെ ആളുകൾ വരാതായി. പരിസര പ്രദേശങ്ങളിലെ വിദ്യാർഥികളും അപൂർവ സസ്യങ്ങൾ കാണാൻ ഇവിടെ എത്തിയിരുന്നു.പാർക്കിൻ്റെ പരിപാലനം മൂന്നു വർഷത്തിന് നിർമാണ കമ്പനിയെ ഏൽപിച്ചിട്ടും അധികൃതരുടെ അനാസ്ഥയിൽ ഇത് പ്രാവർത്തികമായില്ല. പാർക്കും പരിസരത്തെ ഓപ്പൺ ജിമ്മും പരിപാലിക്കാൻ ആവശ്യമായ നടപടികൾ ഉണ്ടാകണമെന്ന് നാട്ടുകാർ ആവശ്യപ്പെട്ടു