കപ്പൂർ: 1990–95 കാലഘട്ടത്തിൽ വിവിധ സെവൻസ് മൈതാനങ്ങളിൽ ശ്രദ്ധേയരായ കളിക്കാരുടെ കൂട്ടായ്മയായ ‘റോയൽ ലെജന്റ് ഫുട്ബോൾ ക്ലബ്ബിന്റെ’ പുതിയ ജേഴ്സി പ്രകാശനം ചെയ്തു. കൊഴിക്കര ജാവ ടർഫിൽ സംഘടിപ്പിച്ച ചടങ്ങിൽ മുൻ സന്തോഷ് ട്രോഫി താരം അമ്പാടി, കപ്പൂർ ഗ്രാമ പഞ്ചായത്ത് പ്രസിഡന്റ് നസീമ നാസർ എന്നിവർ ചേർന്ന് എ. സാദിഖിന് ജേഴ്സി കൈമാറിയാണ് പ്രകാശനം നിർവ്വഹിച്ചത്.
ചടങ്ങിൽ ക്ലബ്ബ് കോ-ഓർഡിനേറ്റർ എൻ.വി. അഷ്റഫ് സ്വാഗതം ആശംസിച്ചു. മുൻ കേരള ഫുട്ബോൾ താരം നവാസ്, വാർഡ് മെമ്പർ ഷിഹാബ്, രാഷ്ട്രീയ പാർട്ടി പ്രതിനിധികളായ സുബൈർ കൊഴിക്കര, സനോജ് കണ്ടലായിൽ, യാസർ കൊഴിക്കര, എ. മൊയ്തുണ്ണിക്കുട്ടി എന്നിവർ ചടങ്ങിൽ സംബന്ധിച്ച് ആശംസകൾ അറിയിച്ചു. പരിപാടികൾക്ക് അനീഷ്, റഷീദ്, മൻസൂർ എന്നിവർ നേതൃത്വം നൽകി.
ജേഴ്സി പ്രകാശനത്തിന് ശേഷം കേരള സർക്കാരിന്റെ ‘ഓപ്പറേഷൻ തൂഫാൻ’ ലഹരിവിരുദ്ധ ക്യാംപയിന് ഐക്യദാർഢ്യം പ്രഖ്യാപിച്ചുകൊണ്ട് സൗഹൃദ ഫുട്ബോൾ മത്സരവും സംഘടിപ്പിച്ചു.
