ചങ്ങരംകുളം:സംസ്ഥാന പാതയില് കടവല്ലൂരില് നിയന്ത്രണം വിട്ട് തോട്ടിലേക്ക് വീണ കാര് കരക്ക് കയറ്റി.കുന്നംകുളം ഫയര്ഫോഴ്സിന്റെ നേതൃത്വത്തില് ക്രെയിന് ഉപോഗിച്ചാണ് ചൊവ്വാഴ്ച കാലത്ത് 11മണിയോടെ പാലത്തിന് അടിയില് കുടുങ്ങി കിടന്ന കാര് പുറത്തെടുത്തത്.തിങ്കളാഴ്ച വൈകിയിട്ട് നാല് മണിയോടെയാണ് കുറ്റിപ്പുറം തൃശ്ശൂര് സംസ്ഥാന പാതയില് മലപ്പുറം ജില്ലയുടെ അതിര്ത്തിയായ കടവല്ലൂര് പാടത്ത് നിയന്ത്രണം വിട്ട കാര് തോട്ടിലേക്ക് വീണത്.കാര് ഓടിച്ചിരുന്ന ഡ്രൈവര് പുറത്തേക്ക് ചാടി രക്ഷപ്പെട്ടിരുന്നു.കുന്നംകുളം ഭാഗത്ത് നിന്ന് ചങ്ങരംകുളം ഭാഗത്തേക്ക് വന്നിരുന്ന ബലാനൊ കാറാണ് നിയന്ത്രണം വിട്ട് നിരഞ്ഞൊഴുകുന്ന തോട്ടിലേക്ക് വീണത്.
വളാഞ്ചേരി കൊളത്തൂര് സ്വദേശി ജാബിര് ആണ് വാഹനത്തില് ഉണ്ടായിരുന്നത്.പതിനഞ്ച് അടിയോളം ഉയരത്തില് വെള്ളം നിറഞ്ഞൊഴുകുന്നതോട്ടിലേക്ക് വീണ കാര് പൂര്ണ്ണമായും വെള്ളത്തിനടിയിലായിരുന്നു.കുന്നംകുളത്ത് നിന്ന് പോലീസും ഫയര്ഫോഴ്സും സ്കൂബ ടീമും സംയുക്തമായി വാഹനം കരക്ക് കയറ്റാന് സംയുക്തമായി ശ്രമിച്ചെെങ്കിലും ശ്രമങ്ങള് ഫലം കണ്ടില്ല.പിന്നീട് വാഹനം പാലത്തിനടിയിലേക്കനീങ്ങി കിടക്കുകയായിരുന്നു.മണിക്കൂറുകള് നീണ്ട ശ്രമം രാത്രി ഏറെ വൈകിയതോടെ ഉപേക്ഷിക്കുകയായിരുന്നു.പിന്നീട് ചൊവ്വാഴ്ച കാലത്ത് വീണ്ടും നാട്ടുകാരും പോലീസും ഫയര്ഫോഴ്സും സ്കൂബ ടീം അംഗങ്ങളും ചേര്ന്നാണ് വാഹനം കരക്ക് കയറ്റിയത്.വാഹനം പൂര്ണ്ണമായും തകര്ന്ന അവസ്ഥയിലാണ്
