ചമ്മന്നൂർ:ശാരീരിക-മാനസിക ആരോഗ്യവും സൗഹൃദവും വളർത്തുന്നതിനൊപ്പം സാമൂഹിക ക്ഷേമവും ലക്ഷ്യമിട്ട് രൂപീകരിച്ച മെക് 7 അമൽ ചമ്മനൂർ ചാപ്റ്ററിന്റെ ഉദ്ഘാടനം പുന്നയൂർക്കുളം പഞ്ചായത്ത് പ്രസിഡന്റ് ഹസ്സൻ തളികശ്ശേരി നിർവഹിച്ചു.മാനവികമായ ഐക്യത്തിനും സാമൂഹിക പുരോഗതിക്കും വേണ്ടിയുള്ള ഒരു ചാലകശക്തിയായി ഈ യൂണിറ്റ് മാറട്ടെയെന്ന് ചടങ്ങിൽ മുഖ്യാതിഥിയായിരുന്ന ചീഫ് ട്രെയിനർ ആശംസിച്ചു.മെക് 7 അമൽ ചാപ്റ്റർ പ്രസിഡന്റ് അലി പഷ്ണത്തയിൽ അധ്യക്ഷത വഹിച്ച ചടങ്ങിൽ ചീഫ് കോർഡിനേറ്റർ കുഞ്ഞിമുഹമ്മത് വീട്ടിപ്പറമ്പിൽ, ജനറൽ സെക്രട്ടറി അഷ്ക്കർ അറക്കൽ എന്നിവർ പരിപാടികൾക്ക് നേതൃത്വം നൽകി.
പ്രതീക്ഷിച്ചതിലും മികച്ച ജനപങ്കാളിത്തമാണ് ഉദ്ഘാടന ചടങ്ങിൽ ദൃശ്യമായത്.സ്ത്രീകളടക്കം അയൽപ്രദേശങ്ങളിലെ വിവിധ യൂണിറ്റുകളിൽ നിന്നുള്ള നിരവധി അംഗങ്ങളുടെ സജീവ സാന്നിധ്യം പരിപാടിയെ ശ്രദ്ധേയമാക്കി.ചടങ്ങിനിടയിൽ പെയ്ത മഴ പരിപാടിയെ ഒട്ടും ബാധിച്ചില്ല എന്നതും ശ്രദ്ധേയമായി. അമൽ സ്കൂളിന്റെ വിശാലമായ ഇൻഡോർ സൗകര്യമാണ് പ്രതികൂല കാലാവസ്ഥയിലും പരിപാടി സുഗമമായി നടക്കാൻ തുണയായത്. വൻ ആവേശത്തോടെയും സദസ്സിന്റെ സജീവ പങ്കാളിത്തത്തോടെയുമാണ് ഉദ്ഘാടന ചടങ്ങുകൾ സമാപിച്ചത്.
