അബുദാബി:അറിവിന്റെ ലോകത്ത് പുതിയ ഉയരങ്ങൾ കീഴടക്കി മലയാളി ഗവേഷക ഡോ. മർവ മുഹമ്മദ് ഷാഹിദ്. യുഎഇയിലെ പ്രമുഖ ഉന്നതവിദ്യാഭ്യാസ സ്ഥാപനമായ അബുദാബി ഖലീഫ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജിയിലെ ജിയോളജി ഡിപ്പാർട്ട്മെന്റിൽ നിന്നാണ് മർവ ഡോക്ടറേറ്റ് (Ph.D.) കരസ്ഥമാക്കിയത്.
പ്രശസ്തമായ ഖലീഫ യൂണിവേഴ്സിറ്റിയിൽ സ്കോളർഷിപ്പോടെ 2023 ലാണ് മർവ തന്റെ ഗവേഷണത്തിന് തുടക്കം കുറിച്ചത്.ഭൂമിയുടെ ചരിത്രത്തിലെ അതിപ്രധാനമായ ‘ലേറ്റ് ട്രയാസിക്’ (Late Triassic) കാലഘട്ടത്തിലെ ‘കാർണിയൻ പ്ലൂവിയൽ എപ്പിസോഡ്’ (Carnian Pluvial Episode) എന്ന പ്രതിഭാസത്തെക്കുറിച്ചായിരുന്നു മർവയുടെ ഗവേഷണം.കോടിക്കണക്കിന് വർഷങ്ങൾ പഴക്കമുള്ള കാലാവസ്ഥാ രേഖകൾ (Climate proxies) വിശകലനം ചെയ്തു കൊണ്ട്,കാർബൺ ചക്രത്തിലുണ്ടായ മാറ്റങ്ങളും ധ്രുവപ്രദേശങ്ങൾ ഇത്തരം കാലാവസ്ഥാ വ്യതിയാനങ്ങളോട് എങ്ങനെ പ്രതികരിക്കുന്നു എന്നും മർവ തന്റെ പഠനത്തിലൂടെ കണ്ടെത്തി.ഭാവിയിലെ ആഗോള കാലാവസ്ഥാ വ്യതിയാനങ്ങൾ കൂടുതൽ കൃത്യതയോടെ പ്രവചിക്കാൻ ശാസ്ത്രലോകത്തെ സഹായിക്കുന്നതാണ് ഈ ഗവേഷണം.
ഗവേഷണ കാലയളവിൽ നിരവധി അന്താരാഷ്ട്ര നേട്ടങ്ങളും പര്യവേഷണങ്ങളുമാണ് മർവയെ തേടിയെത്തിയത്.യുഎഇയുടെ പോളാർ റിസർച്ച് സെന്ററിന്റെ ഭാഗമായി ആർട്ടിക് മേഖലയിലെ ‘ദി യൂണിവേഴ്സിറ്റി സെന്റർ ഇൻ സ്വാൽബാർഡ്’ (UNIS) സന്ദർശിക്കാനും ഗവേഷണങ്ങളിൽ പങ്കാളിയാവാനും മർവയ്ക്ക് സാധിച്ചു.
എൻവയോൺമെന്റ് ഏജൻസി അബുദാബിയുടെ (EAD) കീഴിൽ അറേബ്യൻ ഗൾഫ് തീരം മാപ്പ് ചെയ്യുന്നതിനായി പുറപ്പെട്ട ‘ജയ്വൂൺ’ (Jaywun) എന്ന അത്യാധുനിക ഗവേഷണ കപ്പലിലെ ശാസ്ത്രജ്ഞരുടെ സംഘത്തിലും മർവ അംഗമായിരുന്നു.മിഡിൽ ജുറാസിക് എർത്ത് സിസ്റ്റം ആൻഡ് ടൈംസ്കെയിൽ പ്രോജക്റ്റ്’ എന്ന അന്താരാഷ്ട്ര ഡ്രില്ലിംഗ് പദ്ധതി നിർദ്ദേശിച്ച പ്രമുഖ ശാസ്ത്ര സംഘത്തിലേക്ക് മർവയും തിരഞ്ഞെടുക്കപ്പെട്ടിരുന്നു. അയർലണ്ടിലെ പ്രശസ്തമായ ട്രിനിറ്റി കോളേജ് ഡബ്ലിനിൽ (Trinity College Dublin) മൂന്ന് മാസം വിസിറ്റിംഗ് റിസർച്ചർ ആയി സേവനമനുഷ്ഠിച്ചു.കൂടാതെ, സാമ്പിൾ ശേഖരണത്തിനായി ബെൽഫാസ്റ്റിലെ ‘ബ്രിട്ടീഷ് ജിയോളജിക്കൽ സർവേ ഓഫ് നോർത്തേൺ അയർലൻഡ്’ സന്ദർശിക്കുകയും ചെയ്തു.ഇറ്റലിയിലെ പ്രശസ്തമായ ‘ഉർബിനോ സമ്മർ സ്കൂൾ ഇൻ പാലിയോക്ലൈമറ്റോളജി’യിലേക്ക് തിരഞ്ഞെടുക്കപ്പെടുകയും, ഓസ്ട്രിയയിലെ വിയന്നയിൽ നടന്ന യൂറോപ്യൻ ജിയോ സയൻസസ് യൂണിയൻ (EGU) ജനറൽ അസംബ്ലിയിൽ തന്റെ ഗവേഷണ പ്രബന്ധങ്ങൾ അവതരിപ്പിക്കുകയും ചെയ്തു. ഇതിനു പുറമേ, യുഎഇ ഗ്രാജുവേറ്റ് റിസർച്ച് കോൺഫറൻസിലും (UAEGSRC) മർവ പ്രബന്ധങ്ങൾ അവതരിപ്പിച്ചിട്ടുണ്ട്.അൽ ഐൻ ഇന്ത്യൻ സ്കൂളിലായിരുന്നു മർവയുടെ പ്രാഥമിക വിദ്യാഭ്യാസം.കോഴിക്കോട് ഫാറൂഖ് കോളേജിൽ നിന്ന് കെമിസ്ട്രിയിൽ ബിരുദം നേടിയ ശേഷം, കേരള ഫിഷറീസ് ആൻഡ് ഓഷ്യൻ സ്റ്റഡീസ് യൂണിവേഴ്സിറ്റിയിൽ (KUFOS) നിന്ന് മറൈൻ കെമിസ്ട്രിയിൽ ഒന്നാം റാങ്കോടെയാണ് മർവ ബിരുദാനന്തര ബിരുദം പൂർത്തിയാക്കിയത്.യുഎഇ യൂണിവേഴ്സിറ്റി ഉദ്യോഗസ്ഥനായ വളാഞ്ചേരി സ്വദേശി മുഹമ്മദ് ഷാഹിദിന്റെയും കോക്കൂർ സ്വദേശി അഡ്വക്കറ്റ് പിപി റസിയയുടെയും മകളാണ് മർവ.വയനാട് സ്വദേശി, സീനിയർ കെമിസ്റ്റ്, മുഹമ്മദ് അസ്ഹറാണ് ഭർത്താവ്.
