ചമ്മന്നൂർ: അമൽ ഇംഗ്ലീഷ് സ്കൂളിൽ ലോക ബാലവേല വിരുദ്ധ ദിനം വിപുലമായ പരിപാടികളോടെ ആചരിച്ചു. സ്കൂളിലെ എൽ.പി. സെക്ഷൻ റേഡിയോ ആൻഡ് മീഡിയ ക്ലബ്ബിന്റെ ആഭിമുഖ്യത്തിൽ ‘ചെയിൻ ഓഫ് ഹോപ്പ്’ എന്ന പേരിൽ വിദ്യാർത്ഥികൾ ബാലവേലക്കെതിരായി അണിനിരന്ന മനുഷ്യച്ചങ്ങല ശ്രദ്ധേയമായി.
ബാലവേല അവസാനിപ്പിക്കണമെന്ന സന്ദേശമുയർത്തി വിദ്യാർത്ഥികൾ തീർത്ത മനുഷ്യച്ചങ്ങലയിൽ ‘STOP’ എന്ന വാക്ക് രൂപീകരിക്കാൻ നൂറ്റിഅമ്പതോളം കുട്ടികളും, ‘CHILD LABOUR’ എന്ന വാക്ക് രൂപീകരിക്കാൻ ഇരുനൂറിലധികം കുട്ടികളും പങ്കാളികളായി.
മനുഷ്യച്ചങ്ങലയ്ക്ക് ശേഷം വിദ്യാർത്ഥികളിൽ ബാലവേലക്കെതിരെ അവബോധം സൃഷ്ടിക്കുന്നതിനായി ക്ലബ്ബിന്റെ നേതൃത്വത്തിൽ സ്കിറ്റും വീഡിയോ പ്രസന്റേഷനും സംഘടിപ്പിച്ചു.
കുട്ടികളുടെ അവകാശങ്ങളെക്കുറിച്ചും ബാലവേലയുടെ ദോഷവശങ്ങളെക്കുറിച്ചും വ്യക്തമാക്കുന്നതായിരുന്നു പരിപാടികൾ.
മീഡിയ ക്ലബ്ബ് അധ്യാപകരും പി.ടി. അധ്യാപകരും ചേർന്നാണ് പരിപാടികൾക്ക് നേതൃത്വം നൽകിയത്.
ചടങ്ങിൽ സ്കൂൾ പ്രിൻസിപ്പാൾ, അഡ്മിനിസ്ട്രേറ്റർ, മാനേജ്മെന്റ് ചെയർമാൻ, ജനറൽ സെക്രട്ടറി, മറ്റ് മാനേജ്മെന്റ് പ്രതിനിധികൾ എന്നിവർ സന്നിഹിതരായിരുന്നു.
