കുന്നംകുളം : കുന്നംകുളം കേച്ചേരി കല്ലട ബാറിൽ യുവാവിനെ സംഘം ചേർന്ന് മർദിച്ച കേസിൽ ആറു പ്രതികളെ കുന്നംകുളം പോലീസ് അറസ്റ്റ് ചെയ്തു. വെങ്കിടങ്ങ് പാടൂർ സ്വദേശിയായ സിയാദ് (30), കേച്ചേരി പിറന്നല്ലൂർ സ്വദേശി ശ്രീരാഗ് (24), ചൂണ്ടൽ പാറന്നൂർ സ്വദേശി രാഹുൽ (29), കേച്ചേരി സ്വദേശി വിഷ്ണു (28), പെരുമ്പടപ്പ് വന്നേരി സ്വദേശി മുബഷിർ (19), പാവറട്ടി വെന്മേനാട് സ്വദേശി റാഷിദ് (30) എന്നിവരാണ് പിടിയിലായത്.
ചൊവ്വാഴ്ച വൈകിട്ട് 6.30ഓടെയാണ് സംഭവം. കേച്ചേരി കല്ലട ബാറിൽ മദ്യപിക്കാനെത്തിയ ചിറനല്ലൂർ സ്വദേശി കബീറിനെ (38) എട്ടംഗ സംഘം ിച്ച് മർദിക്കുകയായിരുന്നുവെന്ന് പോലീസ് പറഞ്ഞു . പരിക്കേറ്റ കബീറിനെ തൃശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
സംഭവത്തിന് പിന്നാലെ പ്രതികൾ സ്ഥലത്ത് നിന്ന് രക്ഷപ്പെട്ടിരുന്നു. തുടർന്ന് മൊബൈൽ ഫോൺ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളുടെ ഒളിത്താവളം പോലീസ് കണ്ടെത്തിയത്. രക്ഷപ്പെടാൻ ഉപയോഗിച്ച വാഹനം ഉപേക്ഷിച്ച ശേഷം പാടത്തുകൂടി ഓടി രക്ഷപ്പെടാൻ ശ്രമിച്ച പ്രതികളെ പോലീസ് പിന്തുടർന്ന് പിടികൂടുകയായിരുന്നു.കേസിൽ ഉൾപ്പെട്ട മറ്റ് പ്രതികൾക്കായുള്ള അന്വേഷണം തുടരുകയാണെന്ന് കുന്നംകുളം പോലീസ് അറിയിച്ചു.
