ചമ്മനൂർ:പത്ത്,പന്ത്രണ്ട് ക്ലാസ്സുകളിലെ പൊതുപരീക്ഷകളിൽ ഉന്നത വിജയം കരസ്ഥമാക്കിയ വിദ്യാർത്ഥികളെ അമൽ ഇംഗ്ലീഷ് സ്കൂൾ മാനേജ്മെന്റും പിടിഎയും ചേർന്ന് ആദരിച്ചു. സ്കൂൾ ഓഡിറ്റോറിയത്തിൽ നടന്ന പ്രൗഢഗംഭീരമായ ചടങ്ങ് മാനേജ്മെന്റ് ചെയർമാൻ അലി പഷ്ണത്തയിൽ ഉദ്ഘാടനം ചെയ്തു. പ്രിൻസിപ്പാൾ ഗഫൂർ നാലകത്ത് മുഖ്യപ്രഭാഷണം നടത്തി.
വിജയികൾക്കുള്ള ഉപഹാര സമർപ്പണത്തിന് പുറമെ, സ്കൂളിന്റെയും നാടിന്റെയും അഭിമാനമായി മാറിയ പ്രതിഭകളെയും ചടങ്ങിൽ പ്രത്യേകമായി ആദരിച്ചു. മഴവിൽ മലർവാടി സംസ്ഥാനതല കളറിങ് മത്സരത്തിൽ ഒന്നാം സ്ഥാനം നേടിയ അമൽ സ്കൂളിലെ വിദ്യാർത്ഥിനി റയ്ഫ ഫർഹത്ത്, പി.എസ്.സി റാങ്ക് ഹോൾഡർ നിസാർ, വേൾഡ് റെക്കോർഡ് ജേതാവ് ഡോ. സന അബ്ദുൽ സലാം എന്നീ പൂർവ്വ വിദ്യാർത്ഥികൾ ചടങ്ങിൽ ആദരവ് ഏറ്റുവാങ്ങി.അമൽ മാനേജ്മെന്റ് വൈസ് ചെയർമാൻ ഹനീഫ് കെ.വി, ജനറൽ സെക്രട്ടറി ഹുസൈൻ ചെറുവത്തൂർ, ട്രഷറർ ഫസലു റഹ്മാൻ, മാനേജ്മെന്റ് അംഗം അബു ഏനിക്കുട്ടി, പിടിഎ പ്രസിഡന്റ് ഷഹീർ, അഡ്മിനിസ്ട്രേറ്റർ ഡോ. ഹരിദയാൽ എന്നിവർ ആശംസകൾ അർപ്പിച്ചു സംസാരിച്ചു.
വൈസ് പ്രിൻസിപ്പൽ ലിഷ അനിൽ, വിവിധ വിഭാഗം കോർഡിനേറ്റർമാർ, അധ്യാപകർ, അനധ്യാപകർ, പിടിഎ ഭാരവാഹികൾ, രക്ഷിതാക്കൾ എന്നിവർ ചടങ്ങിൽ സംബന്ധിച്ചു.സ്കൂളിന്റെ മികച്ച വിജയത്തിന് പിന്നിൽ പ്രവർത്തിച്ച അധ്യാപകർക്കും രക്ഷിതാക്കൾക്കും മാനേജ്മെന്റ് ചടങ്ങിൽ നന്ദി രേഖപ്പെടുത്തി.
