ചങ്ങരംകുളത്ത് വനിതാ ഹോട്ടലില്‍ ഗ്യാസ് സിലിണ്ടറിന് തീപിടിച്ച് ഉപകരണങ്ങൾ കത്തി നശിച്ചു

ചങ്ങരംകുളം:വനിതാ ഹോട്ടലില്‍ ഗ്യാസ് സിലിണ്ടറിന് തീപിടിച്ചത് ഏറെ നേരം പരിഭ്രാന്തി പരത്തി.തിങ്കളാഴ്ച കാലത്ത് പത്തര മണിയോടെ ചങ്ങരംകുളം ടൗണില്‍ നന്നംമുക്ക് റോഡില്‍ പോസ്റ്റോഫീസിന് സമീപത്ത് പ്രവര്‍ത്തിക്കുന്ന തനിമ ജനകീയ ഹോട്ടലിലാണ് സംഭവം.ജീവനക്കാര്‍ ഭക്ഷണം പാചകം ചെയ്യാനായി ഗ്യാസ് കത്തിച്ചതോടെ തീ ആളിപ്പടരുകയായിരുന്നു.തുടര്‍ന്ന് ജീവനക്കാര്‍ പുറത്തേക്ക് ഓടി രക്ഷപ്പെടുകയായിരുന്നു.സമീപത്തെ കച്ചവടക്കാരും നാട്ടുകാരും ചേര്‍ന്ന് തീ കെടുത്താന്‍ ശ്രമിച്ചെങ്കിലും തീ കൂടുതലായി കത്താന്‍ തുടങ്ങിയതോടെ നാട്ടുകാര്‍ പോലീസിലും ഫയര്‍ഫോഴ്സിലും വിവരം അറിയിച്ചു.ഏറെ നേരത്തെ പരിശ്രമത്തിന് ശേഷമാണ് തീഅണക്കാനായത്.ചങ്ങരംകുളം പോലീസും പൊന്നാനിയില്‍ നിന്നും ഫയര്‍ഫോഴ്സും സ്ഥലത്ത് എത്തി.ഗ്യാസ് ലീക്ക് വന്നതാണ് അപകടത്തിന് കാരണമെന്നാണ് നിഗമനം.ഗ്യാസ് സിലിണ്ടറിന് തീ പിടിച്ചത് ഏറെ നേരം പ്രദേശത്ത് ആശങ്ക പരത്തി.കടയിലെ ഉപകരണങ്ങള്‍ പലതും കത്തി നശിച്ചെങ്കിലും വലിയ അപകടമാണ് ഒഴിവായത്