തവനൂരില്‍ ഇത്തവണ പോരാട്ടങ്ങള്‍ക്ക് വീര്യം കൂടും’കെടി ജലീലിനോട് മുട്ടാന്‍ സര്‍പ്രൈസ് സ്ഥാനാര്‍ത്ഥി

എടപ്പാള്‍:തുടര്‍ച്ചയായി കെടി ജലീലിലൂടെ സിപിഎം കയ്യടക്കി വെച്ച തവനൂരില്‍ ഇത്തവണ പോരാട്ടങ്ങള്‍ക്ക് വീര്യം കൂടും.ഇനി മത്സരത്തിന് ഇല്ലെന്ന് കെടി ജലീല്‍ പ്രഖ്യാപിച്ചിരുന്നെങ്കിലും തവനൂരില്‍ കെടി ജലീല്‍ തന്നെ മത്സരിക്കണമെന്നാണ് പാര്‍ട്ടി ജലീലിനോട് ആവശ്യപ്പെട്ടിരിക്കുന്നത്.കെടി ജലീല്‍ മണ്ഡലത്തില്‍ തിരഞ്ഞെടുപ്പ് പ്രചരണത്തിന് തുടക്കം കുറിച്ചെന്നൊണ് വിവരം.എന്നാല്‍ യുഡിഎഫ് സ്ഥാനാര്‍ത്ഥിയുടെ കാര്യത്തില്‍ മണ്ഡലത്തില്‍ ഇപ്പോഴും ആശയക്കുഴപ്പം തുടരുന്നുണ്ടെന്നാണ് വിവരം.വിജയസാധ്യത കണക്കിലെടുത്ത് വെച്ച് മാറല്‍ സാധ്യത നിലനില്‍ക്കുന്ന മണ്ഡലങ്ങളില്‍ ഒന്നാണ് തവനൂര്‍.അങ്ങനെ ഒരു സാഹചര്യം വന്നാല്‍ ലീഗ് സ്ഥാനാര്‍ത്ഥിയായി മാണൂര്‍ ബാവഹാജി ഇവിടെ മത്സരത്തിനിറങ്ങാനുള്ള സാധ്യതയാണ് മുന്നില്‍ കാണുന്നത്.എന്നാല്‍ പിടി അജയ്മോഹനും മണ്ഡലത്തില്‍ മത്സരിക്കാനായി പിടിമുറുക്കിയിട്ടുണ്ട്.വിഎസ് ജോയിയെ തവനൂരില്‍ മത്സരിപ്പിക്കാനുള്ള ശ്രമങ്ങളും നടന്ന് വരുന്നുണ്ട്.കെടി ജലീലിനെ തോല്‍പിച്ച് മണ്ഡലം പിടിക്കാന്‍ ഇത്തവണ സര്‍പ്രൈസ് സ്ഥാനാര്‍ത്ഥികളെ രംഗത്തിറക്കുമെന്ന സൂചനയും പുറത്ത് വരുന്നുണ്ട്.സന്ദീപ് വാര്യരെ ഇറക്കി മണ്ഡലത്തില്‍ മാറ്റം കൊണ്ട് വരാന്‍ കഴിയുമെന്ന പ്രതീക്ഷ പ്രവര്‍ത്തകരും പങ്ക് വെക്കുന്നുണ്ട്.ഇതിനിടെ മണ്ഡലത്തില്‍ പലയിടത്തും സന്ദീപ് വാര്യര്‍ക്ക് വേണ്ടി ഫ്ളക്സ് ബോര്‍ഡുകളും ഉയര്‍ന്നിട്ടുണ്ട്.പൊറുക്കര കോണ്‍ഗ്രസ് കമ്മിറ്റിയുടെ പേരിലാണ് ഫ്ളക്സ് ബോര്‍ഡ് ഉയര്‍ന്നിരിക്കുന്നത്.