ചാലിശ്ശേരിയിൽ ഇന്ന് മുതൽ നാല് ദിവസം കലാസന്ധ്യയുടെ നാളുകൾ

ചാലിശ്ശേരി: ചാലിശ്ശേരി മുലയംപറമ്പ് ക്ഷേത്രത്തിൽ മാർച്ച് ഒന്നിന് നടക്കുന്ന പൂരാഘോഷത്തിൻ്റെ ഭാഗമായി ക്ഷേത്ര സംരക്ഷണ സമിതിയുടെ നേതൃത്വത്തിൽ ഇന്ന് മുതൽ നാല് ദിവസം കലാസന്ധ്യയും ഫെബ്രുവരി 28ന് രാത്രി 8ന് അമ്പതിൽപരം കലാകാരന്മാർ അണിനിരക്കുന്ന പഞ്ചാരിമേളവും സംഘടിപ്പിക്കുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. ഫെബ്രുവർ23ന് വൈകുന്നേരം 6.30ന് പൂമുള്ളി നാരായണൻ നമ്പൂതിരി കലാസന്ധ്യ ഉദ്ഘാടനം ചെയ്യും. ചാലിശ്ശേരി ഗ്രാമ പഞ്ചായത്ത് വൈസ് പ്രസിഡണ്ട് സുരേഷ് ബാബു, വാർഡ് മെമ്പർ സജീഷ് കളത്തിൽ, നടൻ ഗോവിന്ദ് പത്മസൂര്യ, ഭാര്യയും നടിയുമായ ഗോപിക അനിൽ എന്നിവർ വിശിഷ്ട അതിഥികളായി പങ്കെടുക്കും. തുടർന്ന് ഭരതനാട്യം, തിരുവാതിരക്കളി, കൈകൊട്ടിക്കളി, ഫ്യൂഷൻ ഡാൻസ്, വയലിൻ കച്ചേരി തുടങ്ങിയ 17 ഇന പരിപാടികൾ അരങ്ങേറും. 24ന് നടക്കുന്ന കലാസന്ധ്യയിൽ കവിയും ഗാനരചയിതാവുമായ റഫീഖ് അഹമ്മദ് മുഖ്യാതിഥിയായിരിക്കും.
24, 25 തീയതികളിൽ മുപ്പതോളം ഇനങ്ങൾ കലാസന്ധ്യയിൽ അരങ്ങുണർത്തും.
26ന് രാത്രി 7 മണിക്ക് ഗ്രൗണ്ടിൽ 11 ടീമുകൾ പങ്കെടുക്കുന്ന മെഗാ വീരനാട്യം അരങ്ങേറും.
28ന് രാത്രി 8ന് നടപ്പന്തലിൽ മേള പ്രമാണി ചൊവ്വല്ലൂർ മോഹനൻ നായരുടെ നേതൃത്വത്തിൽ അമ്പതിൽപരം കലാകാരന്മാർ അണിനിരക്കുന്ന പഞ്ചാരിമേളം അരങ്ങേറും.
വരും വർഷങ്ങളിലും കലാസന്ധ്യ സംഘടിപ്പിക്കുമെന്ന് പ്രോഗ്രാം കോ-ഓഡിനേറ്റർ സന്ധ്യ ചക്രവർത്തി, ജനറൽ സെക്രട്ടറി സി.രവീന്ദ്രൻ എറവക്കാട്, പ്രസിഡൻ്റ് എം.ബി സതീശൻ, രക്ഷാധികാരി എൻ.ഹരിഗോവിന്ദൻ, പ്രോഗ്രാം കമ്മിറ്റി അംഗങ്ങളായ ടി.നന്ദകുമാർ, കെ.ആർ ദിലീഷ് എന്നിവർ അറിയിച്ചു.