കെ.പി.എസ്.എ എടപ്പാൾ ഏരിയ കിഡ്‌സ് ഫെസ്റ്റ് 2026 ജനുവരി 9, 10 തീയതികളിൽ നടക്കും

ചങ്ങരംകുളം:കേരളത്തിലെ അൺഎയ്‌ഡഡ് സ്‌കൂളുകളുടെ സംഘടനയായ കേരള പ്രൈവറ്റ് സ്‌കൂൾസ് അസോസിയേഷൻ (കെ.പി.എസ്.എ) എടപ്പാൾ ഏരിയ കമ്മിറ്റിയുടെ നേതൃത്വത്തിൽ കിഡ്‌സ് ഫെസ്റ്റ് 2026 ജനുവരി 9,10 തീയതികളിൽ വളയംകുളം എം.വി.എം.റെസിഡൻഷ്യൽ ഹയർ സെക്കണ്ടറി സ്‌കൂൾ ക്യാമ്പസിൽ സംഘടിപ്പിക്കും.എടപ്പാൾ മേഖലയിലെ 17 ഓളം അൺഎയ്‌ഡഡ് സ്‌കൂളുകളിൽ നിന്നായി ആയിരത്തോളം കുട്ടികൾ പങ്കെടുക്കുന്ന ദ്വിദിന മേള കുട്ടികളുടെ സൃഷ്ടിപരമായ കഴിവുകൾ,ആത്മവിശ്വാസം,നേതൃത്വഗുണങ്ങൾ എന്നിവ വളർത്തുക എന്ന ലക്ഷ്യത്തോടെയാണ് നടത്തുന്നത്.പാട്ട്,നൃത്തം,ചിത്രരചന,സാഹിത്യ മത്സരങ്ങൾ,സൃഷ്ടിപരമായ അവതരണങ്ങൾ തുടങ്ങിയവ ഉൾപ്പെടെ രണ്ട് കാറ്റഗറികളിലായി 120ൽ പരം വൈവിധ്യമാർന്ന മത്സരങ്ങൾ കിഡ്‌സ് ഫെസ്റ്റിന്റെ ഭാഗമായി അരങ്ങേറും.പഠനത്തോടൊപ്പം കലയ്ക്കും വ്യക്തിത്വവികസനത്തിനും പ്രാധാന്യം നൽകുന്ന വിദ്യാഭ്യാസ കാഴ്ചപ്പാടിന്റെ ഭാഗമായാണ് പരിപാടി സംഘടിപ്പിക്കുന്നത്.കിഡ്‌സ് ഫെസ്റ്റിന്റെ ഉദ്ഘാടനം മലപ്പുറം ജില്ലാ പഞ്ചായത്ത് വൈസ് പ്രസിഡൻ്റ് അഡ്വ. എ.പി. സ്മിജി നിർവഹിക്കും.ആലംകോട് ഗ്രാമപഞ്ചായത്ത് പ്രസിഡൻ്റ് ആസിയ ഇബ്രാഹീം മുഖ്യാതിഥിയായിരിക്കും.കെ.പി.എസ്.എ സംസ്ഥാന പ്രസിഡൻ്റ് പി.പി. യൂസഫലി മുഖ്യപ്രഭാഷണം നടത്തും.സമ്മേളനത്തിൽ വിദ്യാഭ്യാസ രംഗത്തെ പ്രമുഖർ,സ്‌കൂൾ മാനേജ്മെന്റ് പ്രതിനിധികൾ,അധ്യാപകർ,രക്ഷിതാക്കൾ എന്നിവർ പങ്കെടുക്കും.
കെ.പി.എസ്.എ അംഗ സ്‌കൂളുകൾ തമ്മിലുള്ള ഐക്യവും സഹകരണവും കൂടുതൽ ശക്തിപ്പെടുത്തുന്ന വേദിയാകുന്നതോടൊപ്പം കുട്ടികളുടെ കലാപരവും സാംസ്‌കാരികവുമായ കഴിവുകൾ പ്രകടിപ്പിക്കാനുള്ള മികച്ച അവസരമായിരിക്കും കിഡ്‌സ് ഫെസ്റ്റ് 2026 എന്നും സംഘാടകർ അറിയിച്ചു.കിഡ്‌സ് ഫെസ്റ്റ് സംബന്ധിച്ച് നടന്ന പത്രസമ്മേളനത്തിൽ പി.ജെ.മുജീബ്‌റഹ്മാൻ,ടി.ഐ. നിധീഷ്,എ.പി.അഷ്‌റഫ്, ജയൻ കമ്പരത്ത്, വാരിയത്ത് മുഹമ്മദ് അലി,കുഞ്ഞിമുഹമ്മദ് പന്താവൂർ, റഷീദ് കരികപ്പാറ എന്നിവർ പങ്കെടുത്തു.