സന്തോഷ് ട്രോഫിയുടെ കേരളടീമിൽ ഗോൾകീപ്പറായി തൃത്താല സ്വദേശിയും

തൃത്താല : സന്തോഷ് ട്രോഫിയുടെ കേരളടീമിൽ ഗോൾകീപ്പറായി തിരഞ്ഞെടുക്കപ്പെട്ട കെ. മുഹമ്മദ് നിയാസ് തൃത്താലക്കാരുടെ അഭിമാനമായി. ടീമിലെ മൂന്ന് ഗോൾക്കീപ്പർമാരിൽ ഒരാളായാണ് തൃത്താല മേഴത്തൂർ കാട്ടുതേയിൽ കെ. മുഹമ്മദ് നിയാസ് തിരഞ്ഞെടുക്കപ്പെട്ടത്.സ്കൂൾകാലഘട്ടം മുതൽ ഫുട്‌ബോൾ മത്സരങ്ങളിൽ തിളങ്ങിയയാളാണ് നിയാസ്. പ്രഥമ കേരളാ സൂപ്പർലീഗ് ചാമ്പ്യന്മാരായ കാലിക്കറ്റ് എഫ്.സി.യുടെ ഗോളിയായി. മംഗളൂരു യൂണിവേഴ്‌സിറ്റി പഠനകാലത്ത് യൂണിവേഴ്സിറ്റി ടീമിൽ മൂന്നുവർഷക്കാലം ഗോൾവല കാത്തു. മംഗളൂരുവിലെ മികച്ചപ്രകടനം കാലിക്കറ്റ് എഫ്.സി.യുടെ സ്വന്തം താരമാക്കി. ആദ്യമായാണ് കേരളത്തിനുവേണ്ടി ഗ്ലൗസ് അണിയുന്നത്. ഷറഫുദ്ദീനും സമീറയുമാണ് രക്ഷിതാക്കൾ.