25കോടി ആര്‍ക്ക്? അറിയാന്‍ മണിക്കൂറുകള്‍ മാത്രം; വിറ്റത് 75 ലക്ഷം ടിക്കറ്റുകൾ

കാത്തിരിപ്പിനൊടുവിൽ സംസ്ഥാന ഭാഗ്യക്കുറി വകുപ്പിന്റെ തിരുവോണം ബമ്പർ നറുക്കെടുപ്പ് ഇന്ന്. 25 കോടി രൂപയാണ് ഒന്നാം സമ്മാനമായി നൽകുന്നത്. തിരുവനന്തപുരം ഗോര്‍ഖി ഭവനിൽ വെച്ച് ധനമന്ത്രി കെഎന്‍ ബാലഗോപാലാണ് നറുക്കെടുക്കുന്നത്. ആകെ 75 ലക്ഷം ടിക്കറ്റുകളാണ് ഇത്തവണ വിറ്റഴിച്ചത്. പാലക്കാടാണ് ഏറ്റവും കൂടുതല്‍ വില്പന നടന്നത്. 14 ലക്ഷത്തിലധികം ടിക്കറ്റുകളാണ് ഇവിടെ വിറ്റത്. 500 രൂപ വിലയുള്ള ടിക്കറ്റിന് ഒരു കോടി രൂപ വീതം 20 പേര്‍ക്കാണ് രണ്ടാം സമ്മാനം. മൂന്നാം സമ്മാനമായി 50 ലക്ഷം വീതം 20 പേര്‍ക്കും നാലാം സമ്മാനമായി അഞ്ചുലക്ഷം വീതം 10 പരമ്പരകള്‍ക്കും അഞ്ചാം സമ്മാനമായി രണ്ടു ലക്ഷം വീതം 10 പരമ്പരകള്‍ക്കും നല്‍കുന്നു. കൂടാതെ 5,000 മുതല്‍ 500 രൂപ വരെ സമ്മാനമായി നല്‍കുന്നു. ആദ്യം പൂജാ ബമ്പറിന്‍റെ പ്രകാശനവും നടക്കും. 12 കോടി രൂപയാണ് പൂജാ ബമ്പറിന്‍റെ ഒന്നാം സമ്മാനം. 300 രൂപയാണ് ടിക്കറ്റ് വില. ഉച്ചയ്ക്ക് ഒന്നിന് നടക്കുന്ന പ്രത്യേക ചടങ്ങില്‍ ധനകാര്യമന്ത്രി കെ.എന്‍. ബാലഗോപാല്‍ തന്നെയാണ് പൂജാ ബമ്പർ ടിക്കറ്റിന്റെ പ്രകാശനവും നിര്‍വഹിക്കുക. ചടങ്ങിൽ ആന്‍റണി രാജു എംഎല്‍എ അധ്യക്ഷനായിരിക്കും. വി കെ പ്രശാന്ത് എംഎല്‍എ, ഭാഗ്യക്കുറി വകുപ്പ് ഡയറക്ടര്‍ ഡോ. മിഥുൻ പ്രേംരാജ് എന്നിവർ സന്നിഹിതനായിരിക്കും. സെപ്റ്റംബർ 27 നായിരുന്നു ആദ്യം തിരുവോണം ബമ്പറിന്‍റെ നറുക്കെടുപ്പ് തീരുമാനിച്ചത്. എന്നാൽ കനത്ത മഴയെത്തുടർന്ന് വിൽപന കുറഞ്ഞതും, ജിഎസ്ടിയിൽ വന്ന മാറ്റം തുടങ്ങിയവ മൂലം നറുക്കെടുപ്പ് മാറ്റിവയ്ക്കുകയായിരുന്നു. വിൽപനയിൽ രണ്ടാം സ്ഥാനം തൃശ്ശൂര്‍ ജില്ലയ്ക്കാണ്. 9,37,400 ടിക്കറ്റുകളും മൂന്നാം സ്ഥാനത്തുള്ള തിരുവനന്തപുരത്ത് 8,75,900 ടിക്കറ്റുകളും ഏജന്‍സികള്‍ വഴി വിൽപന നടന്നു.