ചാലിശ്ശേരി പട്ടാമ്പി റോഡ് ആധുനിക നിലവാരത്തിലേക്ക്; നിര്‍മ്മാണോദ്ഘാടനം സെപ്റ്റംബര്‍ 2 ന് മന്ത്രി മുഹമ്മദ് റിയാസ് നിര്‍വ്വഹിക്കും

തൃത്താല മണ്ഡലത്തിലെ ചാലിശ്ശേരി പട്ടാമ്പി റോഡ് ആധുനിക നിലവാരത്തിലേക്കുയരുന്നു. റോഡിന്റെ നവീകരണ പ്രവൃത്തിയുടെ ഉദ്ഘാടനം സെപ്റ്റംബര്‍ രണ്ടിന് വൈകീട്ട് അഞ്ച് മണിക്ക് കൂറ്റനാട് സെന്ററില്‍ ടൂറിസം പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് നിര്‍വ്വഹിക്കുമെന്ന് തദ്ദേശസ്വയംഭരണ എക്‌സൈസ് പാര്‍ലമെന്ററി കാര്യവകുപ്പ് മന്ത്രി എം ബി രാജേഷ് അറിയിച്ചു.ചാലിശ്ശേരി തണത്തറ പാലം മുതല്‍ പട്ടാമ്പി തൃത്താല റോഡ് ജംഗ്ഷന്‍ വരെയുള്ള 14 കിലോമീറ്റര്‍ നീളത്തിലുള്ള റോഡാണ് ബിഎം ആന്റ് ബിസി നിലവാരത്തില്‍ നവീകരിക്കുന്നത്. റോഡിന്റെ വീതിക്കുറവും വളവ് തിരിവുകളും കാരണം പാതയില്‍ അപകടങ്ങള്‍ പതിവായിരുന്നു. മന്ത്രി എം.ബി. രാജേഷിന്റെ ഇടപെടലിനെ തുടര്‍ന്ന് റീബില്‍ഡ് കേരള ഇനീഷ്യേറ്റീവ്‌സ് [ആര്‍കെഐ] ല്‍ നിന്നും 63.79 കോടി രൂപ സര്‍ക്കാര്‍ അനുവദിച്ചത്. കെ എസ് ടി പി യ്ക്കാണ് (കേരള സ്റ്റേറ്റ് ട്രാന്‍പോര്‍ട്ട് പ്രൊജക്ട് ) നിര്‍വ്വഹണ ചുമതല.നവീകരണത്തിന്റെ ഭാഗമായി റോഡിന്റെ ഇരു വശങ്ങളിലും വീതി കൂട്ടും. 28 കല്‍വര്‍ട്ടുകള്‍ പുതുക്കിപ്പണിയും. ആവശ്യമായ സ്ഥലങ്ങളിലെല്ലാം ഡ്രൈനേജുകളും സ്ഥാപിക്കും. ജനങ്ങളുടെ ബസ്സ് യാത്ര സുരക്ഷിതമാക്കുന്നതിന് ബസ്സ് കാത്തിരിപ്പ് കേന്ദ്രങ്ങളും ബസ്സ് ബേകളും ഒരുക്കും. റോഡിന്റെ നിര്‍മ്മാണം പൂര്‍ത്തീകരിച്ച് 2026 ഫെബ്രുവരിയില്‍ നാടിന് സമര്‍പ്പിക്കാനാണ് ലക്ഷ്യമിടുന്നത്.