ഫ്ലോറിഡയിൽ അറേബ്യൻ ചരിത്രം; മാഞ്ചസ്റ്റർ സിറ്റിയെ വീഴ്ത്തി അൽ ഹിലാൽ ക്ലബ് ലോകകപ്പ് ക്വാർട്ടർ ഫൈനലിൽ

ഫിഫ ക്ലബ് ലോകകപ്പ് ഫുട്ബോൾ ടൂർണമെന്റിൽ വമ്പൻ അട്ടിമറി. ഇം​ഗ്ലീഷ് ഫുട്ബോൾ വമ്പന്മാരായ മാഞ്ചസ്റ്റർ സിറ്റിയെ സൗദി ക്ലബ് അൽ ഹിലാൽ പരാജയപ്പെടുത്തി. 120 മിനിറ്റ് നീണ്ടുനിന്ന പോരാട്ടത്തിൽ മൂന്നിനെതിരെ നാല് ​ഗോളുകൾക്കാണ് അൽ ഹിലാലിന്റെ വിജയം. ഇതാദ്യമായാണ് പെപ് ​ഗ്വാർഡിയോളയുടെ മാഞ്ചസ്റ്റർ സിറ്റി ക്ലബ് ലോകകപ്പിൽ ഒരു മത്സരത്തിൽ പരാജയപ്പെടുന്നത്. മുമ്പ് ബാഴ്സലോണ, ബയേൺ മ്യൂണിക് ക്ലബുകളെയും പരിശീലിപ്പിച്ചിട്ടുള്ള പെപ് ​ഗ്വാർഡിയോള ഇതാദ്യമായി ക്ലബ് ലോകകപ്പിലെ ഒരു മത്സരത്തിൽ പരാജയപ്പെട്ടു.മത്സരത്തിൽ ആദ്യം താളം കണ്ടെത്തിയത് മാഞ്ചസ്റ്റർ സിറ്റിയായിരുന്നു. ഒമ്പതാം മിനിറ്റിൽ ബെർണാണ്ടോ ഡി സിൽവയുടെ ​ഗോളിലൂടെ സിറ്റി സംഘം മുന്നിലെത്തി. ആദ്യ പകുതിയിൽ ഒരു ​ഗോളിന് മുന്നിൽ നിൽക്കാനും സിറ്റിക്ക് സാധിച്ചു.രണ്ടാം പകുതിയിലാണ് മത്സരം കൂടുതൽ ആവേശകരമായത്. 46-ാം മിനിറ്റിൽ മാർക്കോസ് ലിയോനാർഡോയുടെ ​ഗോൾ അൽ ഹിലാലിനെ ഒപ്പമെത്തിച്ചു. ജോവോ കാന്‍സലോയുടെ ഷോട്ട് സിറ്റി ​ഗോൾകീപ്പർ എഡേഴ്സൺ തടഞ്ഞിട്ടെങ്കിലും ലിയോനാർഡോ മികച്ചൊരു ഹെഡറിലൂടെ പന്ത് വലയിലാക്കി. തൊട്ടുപിന്നാലെ 52-ാം മിനിറ്റിൽ കാൻസലോ നൽകിയ പാസ് കൃത്യമായി സ്വീകരിച്ച് മുന്നേറിയ മാൽകോം അൽ ഹിലാലിനായി വീണ്ടും വലചലിപ്പിച്ചു. ഇതോടെ മത്സരത്തിൽ 2-1ന് അൽ ഹിലാൽ മുന്നിലെത്തി.എന്നാൽ അൽ ഹിലാലിന്റെ ആഘോഷങ്ങൾക്ക് ഏതാനും മിനിറ്റുകളുടെ ആയുസെ ഉണ്ടായിരുന്നുള്ളു. 55-ാം മിനിറ്റിൽ എർലിങ് ഹാലണ്ട് വലചലിപ്പിച്ചു. ഇതോടെ മാഞ്ചസ്റ്റർ സിറ്റിക്ക് മത്സരത്തിൽ ഒപ്പമെത്താൻ സാധിച്ചു. പിന്നീട് ഇരുടീമുകളും മത്സരിച്ച് പോരാടിയെങ്കിലും നിശ്ചിത സമയം പൂർത്തിയാകും വരെ ആർക്കും വലചലിപ്പിക്കാൻ സാധിച്ചില്ല.നിശ്ചിത സമയത്ത് ഇരുടീമുകളും രണ്ട് ​ഗോൾ വീതം നേടി സമനില പാലിച്ചതോടെ മത്സരം എക്സ്ട്രാ ടൈമിലേക്ക് നീണ്ടു. 94-ാം മിനിറ്റിൽ കാലിദൊ കൗലിബാലിയുടെ ​ഗോളിൽ അൽ ഹിലാൽ വീണ്ടും മുന്നിലെത്തി. എന്നാൽ 104-ാം മിനിറ്റിൽ ഫിൽ ഫോഡനിലൂടെ സിറ്റി ഒരിക്കൽ കൂടി സമനില ​ഗോൾ കണ്ടെത്തി. ഒടുവിൽ സിറ്റി ആധിപത്യത്തിന് അവസാനമായത് 112-ാം മിനിറ്റിലെ മാർക്കോസ് ലിയോനാർഡോയുടെ ​ഗോളിലൂടെയായിരുന്നു. സിറ്റി താരങ്ങളുടെ മുന്നേറ്റങ്ങൾ ശക്തമായി പ്രതിരോധിച്ച അൽ ഹിലാൽ ​ഗോൾകീപ്പർ യാസിന്‍ ബോനുവിന്റെ പ്രകടനവും നിർണായകമായി. അവശേഷിച്ച എട്ട് മിനിറ്റിൽ ഒരു തിരിച്ചടിക്ക് മാഞ്ചസ്റ്റർ സിറ്റിക്ക് കഴിഞ്ഞില്ല. ഇതോടെ 4-3ന് അൽ ഹിലാൽ വിജയം സ്വന്തമാക്കി.