ക്ലബ് ലോകകപ്പ് ഫുട്ബോൾ; ഇന്റർ മിലാനെ അട്ടിമറിച്ച് ഫ്ലൂമിനൻസ് ക്വാർട്ടർ ഫൈനലിൽ

ഫിഫ ക്ലബ് ലോകകപ്പ് ഫുട്ബോൾ ടൂർണമെന്റിൽ ഇറ്റാലിയൻ ക്ലബ് ഇന്റർ മിലാന് തോൽവി. എതിരില്ലാത്ത രണ്ട് ​ഗോളുകൾക്ക് ബ്രസീലിയൻ ക്ലബ് ഫ്ലൂമിനൻസിനോടാണ് മിലാന്റെ തോൽവി. ഫ്ലൂമിനൻസിനായി ജർമ്മൻ കാനോ, ഹെർകുലീസ് എന്നിവരാണ് വലചലിപ്പിച്ചത്. പരാജയത്തോടെ ഇന്റർ മിലാൻ ക്ലബ് ലോകകപ്പിൽ നിന്ന് പുറത്തായി.മത്സരത്തിന്റെ മൂന്നാം മിനിറ്റിൽ തന്നെ ആദ്യ ​ഗോൾ പിറന്നു. പോസ്റ്റിന് വലതുവശത്ത് നിന്ന് ജോൺ ഏരിയാസ് നൽകിയ പാസ് തകർപ്പൻ ഒരു ഹെഡറിലൂടെ കാനോ വലയിലാക്കി. ആദ്യ പകുതിയിൽ കൂടുതൽ സമയം പന്ത് തട്ടിയത് ഇന്റർ മിലാൻ താരങ്ങളായിരുന്നു. എന്നാൽ ​ഗോൾ അവസരങ്ങൾ നിർമിച്ചതിനൊപ്പവും മികച്ച പ്രതിരോധവുമാണ് ഫ്ലൂമിനൻസിന് ആദ്യ പകുതിയിൽ തുണയായത്. 40-ാം മിനിറ്റിൽ ഇ​ഗ്നാഷ്യോ ഒലിവറോ ഫ്ലൂമിനൻസിനായി വലചലിപ്പിച്ചെങ്കിലും ഓഫ്സൈഡ് നിയമത്തിൽ കുരുങ്ങി.രണ്ടാം പകുതിയിൽ ഇന്റർ മിലാൻ അവസരങ്ങൾ സൃഷ്ടിച്ചെങ്കിലും ​ഗോൾവല ചലിപ്പിക്കാൻ കഴിഞ്ഞില്ല. ഒടുവിൽ രണ്ടാം പകുതിയുടെ ഇഞ്ച്വറി ടൈമിൽ 93-ാം മിനിറ്റിൽ ഹെർകുലീസിന്റെ ​ഗോൾ പിറന്നു. ബോക്സിന് പുറത്ത് കിട്ടിയ ബോൾ ഇടംകാൽ ഷോട്ടുകൊണ്ട് താരം വലയിലാക്കുകയായിരുന്നു. പിന്നാലെ ലോങ്‍ വിസിൽ മുഴങ്ങിയപ്പോൾ ക്ലബ് ലോകകപ്പിലെ വലിയ അട്ടിമറികളിലൊന്ന് സംഭവിക്കുകയും ചെയ്തു.