പത്ത് കോടി വിലയുളള സാധനം ഒളിപ്പിച്ചത് ഭക്ഷണപൊതിയിൽ,​ തായ്‌ലൻഡിൽ നിന്നെത്തിയ യുവാവും യുവതിയും പിടിയിൽ

തിരുവനന്തപുരം: പത്ത് കോടിയിലേറെ വിലമതിക്കുന്ന ഹൈബ്രിഡ് കഞ്ചാവ് കടത്താൻ ശ്രമിച്ച യുവതിയും യുവാവും പിടിയിൽ. തിരുവനന്തപുരം അന്താരാഷ്ട്ര വിമാനത്താവളത്തിലെത്തിയ മലപ്പുറം സ്വദേശികളായ ഷഹീദ് (23), ഷഹാന(21) എന്നിവരെയാണ് കസ്റ്റംസ് അറസ്റ്റ് ചെയ്തത്. ബംഗളൂരുവിൽ വിദ്യാർത്ഥികളായ ഇരുവരും ഭക്ഷണപ്പൊതികളിലാണ് 10.06 കിലോഗ്രാം കഞ്ചാവ് ഒളിപ്പിച്ച് കടത്താൻ ശ്രമിച്ചത്.ബാങ്കോക്കിൽ നിന്ന്‌ സിങ്കപ്പൂർ വഴിയുള്ള സ്‌കൂട്ട് എയർലൈൻസിൽ ശനിയാഴ്ച രാത്രി പത്തരയോടെയാണ്‌ ഇവർ എത്തിയത്. ബംഗളൂരുവിലെ പബ്ബിൽ വച്ചാണ് രണ്ടുപേരും പരിചയപ്പെട്ടതെന്നും സുഹൃത്തുക്കളായതെന്നുമാണ് വിവരം. ഷഹാനയാണ് ഷഹീദിനെ തായ്‌ലാൻഡിൽ കൊണ്ടുപോയതെന്നും അന്വേഷണത്തിൽ വ്യക്തമായി. യുവതി മുമ്പും ഇതുപോലെ യാത്ര ചെയ്തതായും കണ്ടെത്തിയിട്ടുണ്ട്. ഹൈബ്രിഡ് കഞ്ചാവ് കടത്തിയതിന് പിന്നിൽ ഏതെങ്കിലും അന്താരാഷ്ട്ര ശൃംഖലയുമായി ബന്ധമുണ്ടോയെന്നും അന്വേഷിച്ചുവരികയാണെന്ന് കസ്റ്റംസ് അറിയിച്ചു. സാധാരണ കഞ്ചാവിനേക്കാൾ പത്തിരട്ടി വീര്യം കൂടിയതാണ് ഹൈബ്രിഡ് കഞ്ചാവ്. അന്താരാഷ്ട്ര വിപണിയിൽ ഇതിന് വൻവിലയാണ്.