വെൽഫെയർ പാർട്ടി സംസ്ഥാന പ്രസിഡണ്ട് റസാഖ് പാലേരി നയിക്കുന്ന സാഹോദര്യ കേരള പദയാത്ര മെയ് 10 ന് മാറഞ്ചേരിയിൽ

പൊന്നാനി:വെറുപ്പിന്റെ രാഷ്ട്രീയം ശക്തിപ്പെടുന്ന ഈ കാലഘട്ടത്തിൽ സ്നേഹത്തിന്റെയും സാഹോദര്യത്തിന്റെയും രാഷ്ട്രീയം ഉയർത്തിപ്പിടിച്ച് വെൽഫെയർ പാർട്ടി ഓഫ് ഇന്ത്യ സംസ്ഥാന പ്രസിഡണ്ട് റസാഖ് പാലേരി നയിക്കുന്ന സാഹോദര്യ കേരള പദയാത്ര മെയ് 10 ന് പൊന്നാനി മണ്ഡലത്തിലെ മാറഞ്ചേരിയിൽ എത്തുമെന്ന് നേതാക്കള്‍ വാര്‍ത്താസമ്മേളനത്തില്‍ അറിയിച്ചു.

“നാടിൻ്റെ നന്മക്ക് നമ്മളൊന്നാകണം”എന്ന മുദ്രാവാക്യവുമായി കേരളത്തിലെ എല്ലാ നിയമസഭാ മണ്ഡലങ്ങളിലൂടെയും കടന്നുപോകുന്ന ഈ പദയാത്ര,അഴിമതി നിറഞ്ഞ ഫാസിസ്റ്റ് ഭരണകൂടത്തെ തളയ്ക്കാനും ജനങ്ങൾക്ക് സമാധാനത്തോടെ ജീവിക്കാനുള്ള ഒരന്തരീക്ഷം ഒരുക്കാനും ലക്ഷ്യമിടുന്നു.വെറുപ്പിന്റെ പ്രചാരണങ്ങൾക്ക് തടയിട്ട്,സ്നേഹവും ഐക്യവും കൊണ്ട് ഈ നാടിനെ മനോഹരമാക്കാൻ ഓരോരുത്തരും മുന്നിട്ടിറങ്ങേണ്ടത് അനിവാര്യമാണെന്ന് പദയാത്ര ഓർമ്മിപ്പിക്കുന്നു.രാഷ്ട്രീയം എന്നത് ക്രൂരമായ സംഹാരങ്ങളായി അധഃപതിക്കുമ്പോൾ, സംവാദ രാഷ്ട്രീയത്തിൻ്റെ പ്രാധാന്യം ഈ യാത്ര ഉയർത്തിക്കാട്ടുന്നു.

കാര്യങ്ങൾ കൈവിട്ടുപോകുന്ന സാഹചര്യത്തിൽ, നാടിൻ്റെ നന്മയ്ക്കായി ഒരുമിക്കേണ്ടത് ഒരു അനിവാര്യതയാണെന്ന് വെൽഫെയർ പാർട്ടി ആഹ്വാനം ചെയ്യുന്നു.ഈ സുപ്രധാനമായ രാഷ്ട്രീയ മുന്നേറ്റത്തിന് പിന്തുണയും പ്രോത്സാഹനവും നൽകണമെന്ന്
നേതാക്കൾ അഭ്യർത്ഥിച്ചു.മണ്ഡലം പ്രസിഡന്റ്‌ മുഹമ്മദ്‌ പൊന്നാനി,സി വി ഖലീൽ,മൻസൂർ. മാറഞ്ചേരി, ഖദീജ എം എം,അക്ബർ എരമംഗലം, കെ. ഇസ്മായിൽ എന്നിവർ വാര്‍ത്താസമ്മേളനത്തില്‍ പങ്കെടുത്തു.