ചങ്ങരംകുളം: മുറ്റം നാടകവേദി അരങ്ങിലെത്തിച്ച ‘തമ്പുരാൻ മീട്ടിയ തംബുരു’ എന്ന നാടകത്തിൽ അണിനിരന്ന നടീനടന്മാരെയും അണിയറ പ്രവർത്തകരെയും ആദരിച്ചു. സാംസ്കാരിക സമിതി ഗ്രന്ഥശാല ഹാളിൽ സംഘടിപ്പിച്ച ചടങ്ങിൽ മുറ്റം നാടകവേദിയുടെ പുതിയ നാടകമായ ‘അമരാവതി ഹോസ്പിറ്റൽ ഫോർത്ത് ഫ്ലോർ’ എന്ന നാടകത്തിന്റെ പരിശീലനത്തിനും തുടക്കമായി. സിനിമ-സീരിയൽ നടൻ വാസുദേവൻ തിരുമേനി വളയംകുളം പരിപാടി ഉദ്ഘാടനം ചെയ്തു.
സോമൻ ചെമ്പ്രേത്ത് രചന നിർവഹിച്ചതാണ് പുതിയ നാടകമായ ‘അമരാവതി ഹോസ്പിറ്റൽ ഫോർത്ത് ഫ്ലോർ’.
ചടങ്ങിൽ വത്സല അന്തർജ്ജനം, പി. പി. സതീശൻ, സുരേഷ് കുമാർ കാഞ്ഞിയൂർ, രഞ്ജിത്ത് മലമക്കാവ്, രാജൻ ആലങ്കോട്, പുഷ്പൻ മാന്തടം എന്നീ അഭിനേതാക്കളെയും പ്രേമദാസ് പിടാവന്നൂർ, ഷാനി മൂക്കുതല, ശിവദാസ് കല്ലൂർമ്മ എന്നീ അണിയറ പ്രവർത്തകരെയും ആദരിച്ചു.
മുറ്റം നാടകവേദി പ്രസിഡന്റ് ഷൺമുഖൻ വേളയാട്ട് അധ്യക്ഷത വഹിച്ച ചടങ്ങിൽ സെക്രട്ടറി സോമൻ ചെമ്പ്രേത്ത് സ്വാഗതം പറഞ്ഞു. ടി. രാമദാസ്, എം. വി. രവീന്ദ്രൻ, പി. എൻ. ബാബു എന്നിവർ ചടങ്ങിൽ ആശംസകൾ നേർന്നു സംസാരിച്ചു.
