എടപ്പാൾ സോൺ കേരള മുസ്‌ലിം ജമാഅത്ത് :ആദർശ സമ്മേളനം ശനിയാഴ്ച നടക്കും

ചങ്ങരംകുളം:കേരള മുസ്‌ലിം ജമാഅത്തിന്റെ ആഭിമുഖ്യത്തിൽ സംസ്ഥാന വ്യാപകമായി നടന്നു വരുന്ന ആദർശ സമ്മേളനങ്ങളുടെ ജില്ലാതല സമാപനം മെയ് 10 ശനിയാഴ്ച ചങ്ങരംകുളം ഹൈവേയിൽ വെച്ച് നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.വൈകിയിട്ട് 5 മണി മുതൽ രാത്രി 9 വരെ നടക്കുന്ന സമ്മേളനത്തിൽ പ്രമുഖ പണ്ഡിതരും പ്രാസ്ഥാനിക നേതാക്കളും സംബന്ധിക്കും.മതത്തിന്റെ യഥാർത്ഥ തനിമ കളങ്കപ്പെടുത്തിയും പൈതൃകത്തിന്റെ അടിവേരുകൾ അറുത്തുമാറ്റിയും അരക്ഷിതാവസ്ഥ സൃഷ്ടിക്കാൻ ശ്രമിക്കുന്ന മതപരിഷ്കരണ നീക്കങ്ങളെ ചെറുക്കുകയും വഖഫ് ഭേദഗതി ബിൽ ഉൾപ്പെടെ രാജ്യത്ത് മതേതര സമൂഹം നേരിടുന്ന വെല്ലുവിളികളും സാർവത്രികമായി കൊണ്ടിരിക്കുന്ന ലഹരി പ്രശ്നങ്ങളും ചർച്ച ചെയ്യുകയാണ് സമ്മേളന ലക്ഷ്യം.

രാജ്യത്തിന്റെ അഖണ്ഡത തകർക്കുന്ന വിധത്തിലുള്ള ഭീകര പ്രവർത്തനത്തിലൂടെ നാട്ടിൽ സാമുദായിക ചേരിതിരിവ് സൃഷ്ടിക്കാനുള്ള ഗൂഢനീക്കങ്ങളെപ്പറ്റി പൊതു സമൂഹത്തിന് മുന്നറിയിപ്പ് നല്കുവാനും സമ്മേളനം ഉദ്ദേശിക്കുന്നതായി സംഘടനാ നേതാക്കള്‍ പറഞ്ഞു.സോൺ പ്രസിഡണ്ട് സയ്യിദ് എസ് ഐ കെ തങ്ങളുടെ അധ്യക്ഷതയിൽ സമസ്ത കേന്ദ്ര മുശാവറ മെമ്പർ മാരായമംഗലം അബ്ദുറഹ്മാൻ ഫൈസി ഉദ്ഘാടനം ചെയ്യും.അലവി സഖാഫി കൊളത്തൂർ മുഖ്യപ്രഭാഷണം നടത്തും.

സയ്യിദ് അൻവർ സാദാത്ത് സഅദി അൽ അർശദി, പി കെ എം സഖാഫി ഇരിങ്ങല്ലൂർ, സയ്യിദ് സീതിക്കോയ തങ്ങൾ, എം ഹൈദർ മുസ്‌ലിയാർ പ്രസംഗിക്കും.വി.വി അബ്ദുറസാഖ് ഫൈസി സയ്യിദ് എസ് ഐ കെ തങ്ങൾ
കെ സിദ്ധീഖ് മൗലവി അയിലക്കാട്
വാരിയത്ത് മുഹമ്മദലി
പി പി നൗഫൽ സഅദി തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു