കല്യാണവേദിയിലും പിണക്കം: സരിന് കൈ കൊടുക്കാതെ രാഹുലും ഷാഫിയും

പാലക്കാട്: എൽഡിഎഫ് സ്ഥാനാർഥി ഡോ. പി. സരിന് കൈകൊടുക്കാതെ യുഡിഎഫ് സ്ഥാനാർഥി രാഹുൽ മാങ്കൂട്ടത്തിലും ഷാഫി പറമ്പിൽ എംപിയും. പാലക്കാട്ടെ ബിജെപി നേതാവ് നടേശന്റെ മകളുടെ വിവാഹച്ചടങ്ങിലാണ് ഇരുവരും ഒന്നിച്ചെത്തിച്ചത്. സരിൻ പേര് വിളിച്ചിട്ടും രാഹുൽ കൈകൊടുക്കാതെ പോകുകയായിരുന്നു. അതേസമയം, രാഹുലും ഷാഫി പറമ്പിലും മുൻ കോൺഗ്രസ് നേതാവ് എ.വി. ഗോപിനാഥിന് ഹസ്തദാനം നടത്തുകയും ആലിംഗനം ചെയ്യുകയും ചെയ്തു.സരിൻ പലതവണ രാഹുലിന്റെ പേര് വിളിച്ചു. കേൾക്കാതെ പോയതോടെ ഇത് മോശമാണെന്ന് സരിൻ പറഞ്ഞു. പിന്നാലെ അയ്യയ്യയ്യേ എന്ന് പറഞ്ഞ സരിൻ, തനിക്കതിൽ കുഴപ്പമില്ലെന്നും കൂട്ടിച്ചേർത്തു.ജനങ്ങൾ ഇത് കാണുന്നുണ്ടെന്നായിരുന്നു പിന്നീട് മാധ്യമങ്ങളോട് സരിന്റെ പ്രതികരണം. ‘ഗോപിയേട്ടനും ഞാനും നിൽക്കുന്നു. ഗോപിയേട്ടനെ രണ്ടുവശത്തുനിന്നും ചെന്ന് കെട്ടിപ്പിടിക്കുന്നു. ഞാൻ അടുത്ത് നിൽക്കുന്നു. ഗോപിയേട്ടൻ ചെയ്തതും ഞാൻ ചെയ്തതും തമ്മിൽ എന്താ വ്യത്യാസം എന്ന് ഞാൻ ആലോചിച്ചു. ഞാനിവിടെ ഉണ്ട് ഷാഫി എന്ന് ഞാൻ പറഞ്ഞു. എന്നാൽ ഇല്ല എന്നായിരുന്നു മറുപടി. രാഹുൽ എന്നെ കണ്ടിട്ടേയില്ല’, സരിൻ വിശദീകരിച്ചു. കല്യാണവേദിയിലെത്തിയ സരിൻ നേരിട്ട് ചെന്ന് വധൂവരന്മാരെ കണ്ടു. പിന്നാലെ എ.വി. ഗോപിനാഥും ഇവിടെയെത്തി. ഇരുവരും സംസാരിച്ച് വധൂവരന്മാരെ കണ്ട് വേദിയിൽനിന്ന് താഴേക്ക് ഇറങ്ങുമ്പോഴാണ് രാഹുൽ ഷാഫിക്കൊപ്പം എത്തിയത്. ഷാഫിയും രാഹുലും എ.വി. ഗോപിനാഥിനെ അഭിവാദ്യംചെയ്തെങ്കിലും സരിനെ കണ്ടതായി നടിച്ചില്ല.ഈ ഘട്ടത്തിലാണ് ഒരു കൈ തന്നിട്ടുപോകൂ എന്ന് സരിൻ ഇരുവരോടും പറഞ്ഞത്. എന്നാൽ ഇത് കേൾക്കാതെ അവർ പോകുകയായിരുന്നു.’പ്രവൃത്തിയും വർത്തമാനവും തമ്മിൽ ബന്ധവും ആത്മാർഥയുമുള്ള ആളാണ് ഞാൻ. ചാനലുകാർക്ക് ഒരു വാർത്ത തരാൻവേണ്ടി അഭ്യാസം കാണിക്കുക… കഴിഞ്ഞ ദിവസം ഉമ്മൻചാണ്ടി സാറിന്റെ കല്ലറയുടെ മുന്നിൽ പോയി വാർത്തയുണ്ടാക്കി. ഇന്ന് രാവിലെ ഉമ്മൻചാണ്ടി സാറിനെ തള്ളിപ്പറയുകയും ചെയ്തു. ഞാൻ കുറച്ച് ആത്മാർഥതയൊക്കെയുള്ള ആളാണ്. എനിക്കങ്ങനെ അഭ്യാസം പറ്റില്ല’, രാഹുൽ മാങ്കൂട്ടത്തിൽ പറഞ്ഞു.’ഷാഫീ, ഇപ്പുറത്തുണ്ടെന്ന് എന്നോട് പറഞ്ഞു. അപ്പുറത്തുതന്നെയുണ്ടാവണമെന്ന് ഞാൻ മറുപടി നൽകി’, എന്നായിരുന്നു ഷാഫി പറമ്പിലിന്റെ പ്രതികരണം.നേരത്തെ, പാലക്കാട് സിനിമ തിയ്യേറ്ററിൽ വെച്ചും സമാന സാഹചര്യമുണ്ടായിരുന്നു. സിനിമ കാണാനെത്തിയ ഇരുവരും തമ്മിൽ മുഖത്തുനോക്കാൻ പോലും തയ്യാറായില്ല.