‘സ്ത്രീധനം കുറഞ്ഞു പോയി’; ഭാര്യയുടെ കഴുത്തിൽ ഷാളിട്ട് മുറുക്കി കൊല്ലാൻ ശ്രമിച്ച 52കാരന്‍ അറസ്റ്റില്‍

പത്തനംതിട്ട: സ്ത്രീധനത്തിന്റെ പേരിൽ ശാരീരികവും മാനസികവുമായി ഭാര്യയെ പീഡിപ്പിച്ച ഭർത്താവിനെ പൊലീസ് അറസ്റ്റുചെയ്തു. വടശേരിക്കര ഏറം തെക്കുമല പതാലിൽ വീട്ടിൽ ബിജു (52) ആണ് പിടിയിലായത്. ഇയാൾക്കെതിരെ ഭാര്യ പിഎസ് കല (45) മലയാലപ്പുഴ പൊലീസിൽ നൽകിയ പരാതിയെ തുടർന്നാണ് നടപടി. ഈ മാസം 11ന് ബിജു, കലയുടെ കഴുത്തിൽ തുണിയിട്ട് മുറുക്കി ശ്വാസംമുട്ടിച്ച് കൊല്ലാൻ ശ്രമിച്ചു. ക്രൂരമായ മർദ്ദനത്തിൽ നിന്ന് രക്ഷപ്പെട്ട് പന്തളം പൂഴിക്കാടുള്ള താൽക്കാലിക അഭയ കേന്ദ്രമായ ‘സ്‌നേഹിത’ യിൽ എത്തി. പിന്നാലെയാണ് പൊലീസിൽ പരാതി നൽകിയത്. മുമ്പും സമാന സംഭവത്തിന് ഇയാൾക്കെതിരെ കേസെടുത്തിരുന്നു. നിലവിൽ ബിജുവിനെ റിമാൻഡ് ചെയ്തിരിക്കുകയാണ്. പീഡനത്തിൽ പരിക്കേറ്റ കല അടൂർ ജനറൽ ആശുപത്രിയിൽ ചികിത്സയിലാണ്.2020ൽ മലയാലപ്പുഴ സ്വദേശിയായ കലയെ വിവാഹം കഴിക്കുമ്പോൾ പ്രതിയുടെ പ്രായം 47 വയസായിരുന്നു. അന്ന് മുതൽ സ്‌ത്രീധനം കുറഞ്ഞുപോയെന്ന പേരിൽ ഉപദ്രവം പതിവായിരുന്നു എന്നാണ് കലയുടെ പരാതിയിൽ പറഞ്ഞിരിക്കുന്നത്.