ഹൗസ്ബോട്ടിൽ വിനോദ സഞ്ചാരികളെ ആക്രമിച്ച ശേഷം ഒളിവിൽ പോയ 3 പ്രതികൾ അറസ്റ്റിൽ. കൈനകരി കായലിൽപറമ്പ് വീട്ടിൽ വിഷ്ണു (33), തോട്ടുവാത്തല വട്ടത്തറപറമ്പ് വീട്ടിൽ പ്രദീപ് (32), തോട്ടുവാത്തല പടിഞ്ഞാറേ മാടത്താനി വീട്ടിൽ ആർ.സുജിത് (32) എന്നിവരെയാണു പുളിങ്കുന്ന് പൊലീസ് അറസ്റ്റ് ചെയ്തത്. മൈസൂരുവിൽ ഒളിവിൽ കഴിയുകയായിരുന്ന പ്രതികൾ കാസർകോട് എത്തിയപ്പോൾ അവിടെ വച്ചാണ് അറസ്റ്റ് ചെയ്തത്. രാമങ്കരി കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ഇതോടെ കേസിൽ അറസ്റ്റിൽ ആയവരുടെ എണ്ണം 11 ആയി.
കഴിഞ്ഞ 13നു കൈനകരി ഉമ്പിക്കാരംചിറ ഭാഗത്തു കെട്ടിയിട്ടിരുന്ന സമയത്തു ഫോർ സൈറ്റ് ഹൗസ് ബോട്ടിലെ സഞ്ചാരികളെ മാരകായുധങ്ങളുമായി ആക്രമിച്ചെന്നാണു കേസ്. പുളിങ്കുന്ന് എസ്എച്ച്ഒ കെ.ബി.ആനന്ദബാബു, എസ്ഐ പി.ടി.ബിജുക്കുട്ടൻ, എഎസ്ഐ വിനോദ്, സിപിഒമാരായ ടോണി വർഗീസ്, ആർ.ഷാൻ കുമാർ, കെ.ജി.സനീഷ്, ഹരികൃഷ്ണൻ എന്നിവർ ചേർന്നാണ് പ്രതികളെ അറസ്റ്റ് ചെയ്തത്.
