സംസ്ഥാനത്ത് സ്കൂളുകളിലെ ഉച്ചഭക്ഷണ പദ്ധതി പ്രതിസന്ധിയിൽ. സെപ്തംബർ മാസത്തിന് ശേഷം സ്കൂളുകൾക്ക് പദ്ധതിക്കായുള്ള തുക കിട്ടിയിട്ടില്ല. കഴിഞ്ഞ സെപ്തംബറിൽ അനുവദിച്ചത് കേന്ദ്ര വിഹിതം മാത്രമാണെന്ന് അധികൃതർ അറിയിച്ചു. നിലവിൽ 125 കോടിയോളം രൂപയുടെ കുടിശ്ശികയാണ് ആകെയുള്ളത്.
ഇതിൽ 40% തുകയും സംസ്ഥാന സർക്കാറും 60% തുക കേന്ദ്ര സർക്കാറുമാണ് അനുവദിക്കേണ്ടത്. കേന്ദ്ര സർക്കാരിൻ്റെ തുക കിട്ടുന്നതിനനുസരിച്ച് അനുപാതികമായി മാത്രമെ സംസ്ഥാന സർക്കാരിന് തുക വിനിയോഗിക്കാനാകൂ എന്നാണ് സർക്കാർ വിശദീകരണം. 4 കോടി രൂപ അനുവദിക്കാൻ സർക്കാർ ഉത്തരവായെങ്കിലും ഇതുവരെയും വിതരണം ചെയ്തില്ല. ഉച്ചഭക്ഷണം മുടക്കാനാകാത്തതിനാൽ പല പ്രധാനാധ്യാപകരും ലക്ഷക്കണക്കിന് രൂപയുടെ ബാധ്യതയിലാണെന്നും പരാതികൾ ഉയരുന്നുണ്ട്.
