പെരുമ്പടപ്പ് പഞ്ചായത്ത് ഓഫീസിന് മുന്നില്‍ ഉപരോധസമരവുമായിയുഡിഎഫ് പഞ്ചായത്ത് കമ്മിറ്റി

എരമംഗലം:പെരുമ്പടപ്പ് ഗ്രാമപഞ്ചായത്ത് എൽ.ഡി.എഫ് ഭരണസമിതിയുടെ ജനവിരുദ്ധ നയങ്ങൾക്കും വികസന മുരടിപ്പിനും എതിരെ യു.ഡി.എഫ് പഞ്ചായത്ത് കമ്മറ്റി സംഘടിപ്പിച്ച ഗ്രാമപഞ്ചായത്ത് ഓഫീസ് ഉപരോധ സമരത്തിൽ പ്രതിഷേധമിരമ്പി.ജലജീവൻ പദ്ധതിക്കായി കീറിയിട്ട റോഡുകൾ ഗതാഗതയോഗ്യമാക്കുക, ലൈഫ് പദ്ധതിയിൽ ഉൾപ്പെട്ട ഗുണഭോക്താക്കൾക്ക് വീട് നിർമ്മാണത്തിന് പണം അനുവദിക്കുക,വ്യക്തിഗത ആനുകൂല്യങ്ങൾ സമയബന്ധിതമായി അർഹരായവർക്ക് വിതരണം ചെയ്യുക, അഗതി, വാർദ്ധക്യ പെൻഷനുകൾ വിതരണത്തിലെ അപാകതകൾ പരിഹരിക്കുക, നെൽ കർഷകരുടെ പ്രശ്നങ്ങൾക്ക് പരിഹാരം കാണുക, മത്സ്യത്തൊഴിലാളികൾക്കുള്ള ഉപകരണങ്ങൾ ഉടൻ വിതരണം ചെയ്യുക. താളം തെറ്റിയ പഞ്ചായത്ത് ഓഫീസിന്റെ പ്രവർത്തനങ്ങൾ കാര്യക്ഷമമാക്കുക തുടങ്ങിയ ആവശ്യങ്ങൾക്ക് നിരന്തരമായി പരിഹാരം കാണാത്തതിൽ പ്രതിഷേധിച്ചാണ് യു.ഡി.എഫ് പ്രവർത്തകർ ഉപരോധസമരം നടത്തിയത്.ഉപരോധസമരം ജില്ലാ പഞ്ചായത്ത് മെമ്പറും നിയോജകമണ്ഡലം യുഡിഎഫ് ജോ. കൺവീനറുമായ വി.കെ.എം. ഷാഫി ഉദ്ഘാടനം ചെയ്തു.പഞ്ചായത്ത് യു.ഡി.എഫ് ചെയർമാൻ സുബൈർ കൊട്ടിലുങ്ങൽ അധ്യക്ഷത വഹിച്ചു.യൂത്ത് കോൺഗ്രസ് ജില്ലാ സെക്രട്ടറി ടി.വി. ഷബീർ മുഖ്യപ്രഭാഷണം നടത്തി. യു.ഡി.എഫ് നേതാക്കളായ ടി.കെ. റസാഖ്, സി.എം. അബു, വി.കെ. അനസ് മാസ്റ്റർ, പി.കെ. അബൂബക്കർ, കെ. സൈനുദ്ദീൻ, ഗ്രാമപഞ്ചായത്ത് അംഗം അഷ്റഫ്, പൊറാടത്ത് കുഞ്ഞുമോൻ എന്നിവർ പ്രസംഗിച്ചു.ബക്കർ ആമയം, കെ.പി. റാസിൽ ഫാരിസ് ആമയം, സനിൽ സുബി വന്നേരി, ജംഷീർ പാലപ്പെട്ടി, ഷാഫി ചെറവല്ലൂർ, ബിഷർ, സജയൻ എന്നിവർ നേതൃത്വം നൽകി.കാലത്ത് 9 മണിക്ക് പുത്തൻപള്ളി സെൻററിൽ നിന്ന് പ്രകടനമായാണ് യു.ഡി.എഫ് പ്രവർത്തകർ ഉപരോധസമരത്തിന് ഗ്രാമപഞ്ചായത്ത് ഓഫീസ് കവാടത്തിൽ എത്തിയത്. ഓഫീസ് കവാടത്തിൽ ഗ്രാമപഞ്ചായത്ത് വാഹനം നിർത്തി പ്രതിരോധം തീർക്കാനുള്ള സി.പി.എം ശ്രമം യു.ഡി.എഫ് പ്രവർത്തകരും പോലീസും ഇടപെട്ട് ഒഴിവാക്കി.