ചാലിശ്ശേരി:ജീൻസും സൺഗ്ലാസും ധരിച്ച് ഫ്രീക്കൻ ലുക്കിൽ പള്ളിപ്പെരുന്നാളിനെത്തിയ കള്ളന്മാരുടെ തന്ത്രം പൊളിച്ച് ചാലിശ്ശേരി പോലീസ്.തിരക്കിനിടയിൽ സ്വർണ്ണാഭരണങ്ങൾ പൊട്ടിച്ച സംഘത്തിൽ പ്രായപൂർത്തിയാവാത്ത നാല് തമിഴ്നാട് സ്വദേശികൾ പോലീസ് പിടിയിലായി.കഴിഞ്ഞദിവസം നടന്ന ചാലിശ്ശേരി പള്ളിപ്പെരുന്നാളിന്റെ തിരക്കിനിടയിലായിരുന്നു കവർച്ചാ ശ്രമം.സ്ത്രീകൾ ഉൾപ്പെടുന്ന വലിയൊരു സംഘമായാണ് ഇവർ എത്തിയതെന്നാണ് സൂചന. പെരുന്നാൾ തിരക്കിൽ ആൾക്കൂട്ടത്തിൽ കയറിപ്പറ്റി കൃത്രിമമായി ഉന്തും തള്ളലും സൃഷ്ടിച്ച ശേഷം ഒരു കുട്ടിയുടെ സ്വർണ്ണ പാദസരം ഇവർ പൊട്ടിച്ചെടുത്തു.മറ്റൊരാളുടെ മാല വലിച്ചുപൊട്ടിക്കാൻ ശ്രമിച്ചെങ്കിലും മാല നിലത്തുവീണതിനാൽ നഷ്ടപ്പെട്ടില്ല.സംഭവസ്ഥലത്തുവെച്ചുതന്നെ രണ്ടുപേരെ ചാലിശ്ശേരി പോലീസ് കയ്യോടെ പിടികൂടി.വളാഞ്ചേരി ഭാഗത്തേക്ക് കടന്നുകളഞ്ഞ മറ്റ് രണ്ട് പേരെ പിന്നീട് വളാഞ്ചേരി പോലീസിന്റെ സഹായത്തോടെയും വലയിലാക്കി.പ്രതികളിൽ നിന്നും മോഷ്ടിച്ച പാദസരം കണ്ടെടുത്തിട്ടുണ്ട്.പിടികൂടിയ പ്രതികളെ ചാലിശ്ശേരി പോലീസ് സ്റ്റേഷനിലെത്തിച്ചു.പൊരിയും പൂക്കൂടയും വിൽക്കാനെത്തിയതാണെന്ന ഇവരുടെ വാദം പോലീസ് ചോദ്യം ചെയ്യലിൽ പൊളിഞ്ഞു.തമിഴ്നാട് തൂത്തുകുടി സ്വദേശികളായ ഇവർ കുറ്റിപ്പുറം ഭാഗത്താണ് താമസിച്ചിരുന്നത്.ഉത്സവ-പെരുന്നാൾ തിരക്കുകളിൽ എത്തുന്നവർ അതീവ ജാഗ്രത പാലിക്കണമെന്ന മുന്നറിയിപ്പാണ് ഈ സംഭവം നൽകുന്നത്.







