പൊന്നാനി:പ്രസിദ്ധമായ പൊന്നാനി കണ്ടകുറുമ്പക്കാവ് ക്ഷേത്രത്തിൽ ഭക്തജനങ്ങൾക്കായി നിർമിച്ച വിശാലമായ ഊട്ടുപുരയുടെ സമർപ്പണം ഇന്ന് നടക്കും. അക്ബർ ട്രാവൽസ് ഓഫ് ഇന്ത്യ ചെയർമാനും മാനേജിങ് ഡയറക്ടറുമായ ഡോ. കെ.വി. അബ്ദുൽ നാസർ ക്ഷേത്രത്തിന് നിർമിച്ചുനൽകുന്ന ഊട്ടുപുരയുടെ സമർപ്പണമാണ് വിശിഷ്ട വ്യക്തികളുടെ സാന്നിധ്യത്തിൽ നടക്കുക
വടക്കേ നടയിൽ പതിനായിരം ചതുരശ്രയടി വിസ്തീർണത്തിലാണ് ഊട്ടുപുര നിർമിച്ചിരിക്കുന്നത്. ഒരേസമയം ആയിരത്തോളം പേർക്ക് ഇരുന്ന് ഭക്ഷണം കഴിക്കാനുള്ള സൗകര്യമാണ് ഇവിടെ ഒരുക്കിയിട്ടുള്ളത്. ക്ഷേത്രത്തിലെ പ്രധാന ചടങ്ങുകളോടനുബന്ധിച്ചും വിശേഷ ദിവസങ്ങളിലും എത്തുന്ന ഭക്തജനങ്ങൾക്ക് ഏറെ പ്രയോജനകരമാകുന്ന രീതിയിലാണ് ഊട്ടുപുരയുടെ നിർമാണം.ക്ഷേത്രത്തിലെ പ്രതിഷ്ഠാദിനത്തോടനുബന്ധിച്ച് ആയിരക്കണക്കിന് ഭക്തർക്ക് അന്നദാനം ഒരുക്കുന്നതിനും പുതിയ സൗകര്യം സഹായകമാകും. നിലവിൽ വലിയ തോതിൽ ഭക്തജനങ്ങൾ എത്തുന്ന ചടങ്ങുകളിൽ ഭക്ഷണവിതരണത്തിനും ഇരിപ്പിട സൗകര്യങ്ങൾ ഒരുക്കുന്നതിനുമുള്ള പ്രയാസങ്ങൾ പരിഹരിക്കാനും ഊട്ടുപുര ഉപകരിക്കും.
ശബരിമല തീർഥാടന കാലത്ത് ഇടത്താവളമൊരുക്കുന്നതിനുള്ള ഒരുക്കങ്ങൾ നടത്തുന്ന ക്ഷേത്രത്തിന് പുതിയ ഊട്ടുപുര വലിയ മുതൽക്കൂട്ടാകും. ദർശനത്തിനെത്തുന്ന നൂറുകണക്കിന് അയ്യപ്പഭക്തർക്ക് ഭക്ഷണം കഴിക്കുന്നതിനൊപ്പം വിശ്രമിക്കാനും വിരിവെക്കാനും ആവശ്യമായ സൗകര്യങ്ങൾ ഒരുക്കുന്നതിനും കെട്ടിടം പ്രയോജനപ്പെടുത്താനാകും.
ക്ഷേത്രത്തിലെ അന്നദാന പ്രവർത്തനങ്ങൾക്കും തീർഥാടകർക്കുള്ള സേവനങ്ങൾക്കും കൂടുതൽ സൗകര്യവും സൗകര്യപ്രദമായ അന്തരീക്ഷവും ഒരുക്കുന്ന പദ്ധതിയാണ് ഇതോടെ യാഥാർഥ്യമാകുന്നത്. ക്ഷേത്രത്തിന്റെ അടിസ്ഥാന സൗകര്യ വികസനത്തിൽ പുതിയ അധ്യായം കുറിക്കുന്നതാണ് ഊട്ടുപുരയുടെ സമർപ്പണം.







