മികച്ച വൈൽഡ് ലൈഫ് ഫോട്ടോഗ്രാഫറായി തെരഞ്ഞെടുത്ത ജിഷ്ണുവിന് അഭിനന്ദിക്കാന്‍ പാണക്കാട് സയ്യിദ് മുഈനലി ശിഹാബ് തങ്ങളെത്തി

എടപ്പാൾ: കേരള സംസ്ഥാന സർക്കാരിന്റെ വനം വന്യജീവി വകുപ്പ് മികച്ച വൈൽഡ് ലൈഫ് ഫോട്ടോഗ്രാഫറായി തെരഞ്ഞെടുത്ത എടപ്പാൾ തലമുണ്ട കാശിപ്പുള്ളി മനയിലെ ജിഷ്ണുവിന് അഭിനന്ദനങ്ങളുമായി പാണക്കാട് സയ്യിദ് മുഈനലി ശിഹാബ് തങ്ങളെത്തി.തലമുണ്ടയിലെ ജിഷ്ണുവിന്റെ വസതിയിലെത്തിയാണ് തങ്ങൾ നേരിട്ട് ആശംസകൾ അറിയിച്ചത്. സി. എച്ച്. കൾച്ചറൽ സെന്ററിന്റെ ഉപഹാരവും തങ്ങൾ കൈമാറി.
​നാടിന് അഭിമാനമായി മാറിയ യുവ പ്രതിഭയെ നേരിട്ട് കണ്ട് അനുമോദിക്കാനെത്തിയ തങ്ങളെ ജിഷ്ണുവിന്റെ പിതാവ് കൃഷ്ണൻ നമ്പൂതിരിയും കുടുംബാംഗങ്ങളും ചേർന്ന് സ്വീകരിച്ചു.
​പ്രകൃതിയുടെയും വന്യജീവികളുടെയും അപൂർവ്വ ഭാവങ്ങൾ ക്യാമറയിൽ പകർത്തി സംസ്ഥാനതലത്തിൽ മികച്ച നേട്ടം കൈവരിച്ച ജിഷ്ണുവിന്റെ കഴിവ് നാടിനാകെ മാതൃകയാണെന്ന് സയ്യിദ് മുഈനലി ശിഹാബ് തങ്ങൾ പറഞ്ഞു. നാടിന്റെ പ്രിയപ്പെട്ട കലാകാരനെ പാണക്കാട് തങ്ങൾ ഭവന സന്ദർശനം നടത്തി ആദരിച്ച കാഴ്ച, കേരളത്തിന്റെ പരമ്പരാഗത സൗഹാർദ്ദത്തിന്റെയും സാഹോദര്യത്തിന്റെയും സന്ദേശം വിളിച്ചോതുന്നതായിരുന്നു.
​വ്യത്യസ്ത മേഖലകളിൽ തിളങ്ങുന്ന പ്രതിഭകൾക്ക് ജാതിമത ഭേദമന്യേ പിന്തുണയും പ്രോത്സാഹനവും നൽകുന്ന പാണക്കാട് കുടുംബത്തിന്റെ പാരമ്പര്യം ഉയർത്തിപ്പിടിച്ചുള്ള ഈ സന്ദർശനം മതസൗഹാർദ്ദത്തിന്റെ മനോഹരമായ അനുഭവവുമായി മാറി. ജിഷ്ണുവിന്റെ ഭാവിയിലെ സർഗ്ഗാത്മക യാത്രകൾക്ക് എല്ലാവിധ ഭാവുകങ്ങളും നേർന്നാണ് തങ്ങൾ മടങ്ങിയത്.
​സി. എച്ച്. കൾച്ചറൽ സെന്റർ പ്രസിഡന്റ് വി. കെ. എ. മജീദ് അധ്യക്ഷനായി. മുസ്ലിം ലീഗ് മലപ്പുറം ജില്ലാ വൈസ് പ്രസിഡന്റ് ഇബ്രാഹിം മുതുർ, ജില്ലാ പഞ്ചായത്ത് അംഗം അശ്ഹർ പെരുമുക്ക്, പത്തിൽ സിറാജ്, സി. എം. രാമനുണ്ണി, ഗ്രാമപഞ്ചായത്ത് അംഗങ്ങളായ മിനി ടി. വി., ജുബൈരിയ കല്ലിങ്ങൽ, പ്രശസ്ത മാപ്പിളപ്പാട്ട് ഗായകൻ എടപ്പാൾ ബാപ്പു, അഫ്സൽ ടി.അക്‌ബർ എടപ്പാൾ,മുഹമ്മദ് കുട്ടി കല്ലിങ്ങൽ,എടപ്പാൾ ഗവണ്മെന്റ് ഹായർസെക്കന്ററി സ്കൂൾ പ്രിൻസിപ്പൽ അബ്ദുൾ ഗഫൂർ,കെ. വി. ബാവ എന്നിവർ സംസാരിച്ചു.