കണ്ട കുറുമ്പക്കാവ് ക്ഷേത്രത്തിലെ ശബരിമല ഇടത്താവളം’ആലോചനയോഗം ചേർന്നു

പൊന്നാനി:പൊന്നാനി കണ്ട കുറുമ്പക്കാവ് ക്ഷേത്രത്തിലെ ശബരിമല ഇടത്താവള ആലോചനയോഗം പൊന്നാനി താലൂക്ക് ഓഫീസിൽ ചേർന്നു.കെപി നൗഷാദലി എംഎൽഎയുടെ അധ്യക്ഷതയിൽ പൊന്നാനി തഹസിൽദാർ,പോലീസ് ,ആരോഗ്യം, പൊതുവിതരണം, എക്സൈസ്, അഗ്നി സേന വിഭാഗം, പൊതുമരാമത്ത്,നഗരസഭ ഉദ്യോഗസ്ഥർ, കെഎസ്ആർടിസി, ജലസേചനം, ഇടത്താവള കമ്മിറ്റി ഭാരവാഹികൾ തുടങ്ങിയ വിവിധ വകുപ്പുകളാണ് ഏകോപന യോഗം ചേര്‍ന്നത്. നവംബർ 17 മുതൽ ജനുവരി 14 വരെയുള്ള ദിവസങ്ങളിൽ വിവിധ സംസ്ഥാനങ്ങളിൽ നിന്നടക്കം വരുന്ന ആയിരക്കണക്കിന് ശബരിമല ഭക്തർക്ക് വേണ്ട എല്ലാ സൗകര്യങ്ങളും ഒരുക്കുന്നതിനുള്ള കൂടിയാലോചന എംഎൽഎയുടെ അധ്യക്ഷതയിൽ നടന്നു. നവംബർ 17ന് തിരുവിതാംകൂർ മഹാരാജാവ് ശ്രീ പത്മനാഭ ദാസൻ അവിട്ടം തിരുനാൾ ആദിത്യ വർമ്മ തമ്പുരാൻ ഭദ്ര ദീപം കൊളുത്തി ഉദ്ഘാടനം ചെയ്യും.അബ്ദുൽ സമദ് സമദാനി എംപി, പിപി സുനീർ എംപി,വിഎസ് ജോയ് എംഎൽഎ, യോഗക്ഷേമ മുൻ സംസ്ഥാന അധ്യക്ഷൻ അക്കീരമൺ കാളിദാസ ഭട്ടതിരിപ്പാട്,ഗുരുവായൂർ ക്ഷേത്രം തന്ത്രി ചേന്നാസ് ദിനേശൻ നമ്പൂതിരിപ്പാട്,മെട്രോമാൻ ശ്രീധരൻ, നഗരസഭ ചെയർപേഴ്സൺ, പഞ്ചായത്ത് പ്രസിഡണ്ടുമാർ, വിവിധ രാഷ്ട്രീയ സാമുദായിക നേതാക്കൾ ഇടത്താവള ഉദ്ഘാടന പരിപാടികളിൽ പങ്കെടുക്കും. ഡിസംബർ 15ന് കർമ്മ റോഡ് പരിസരത്ത് വിശ്വപ്രസിദ്ധമായ നന്ദഗോവിന്ദം ഭജൻസിന്റെ പരിപാടിയിൽ പതിനായിരത്തിൽപരം ജനങ്ങൾ പങ്കെടുക്കും.പൊന്നാനിയിൽ ഇതുവരെ നടന്നിട്ടില്ലാത്ത യൂനെസ്കോയുടെ പൈതൃക പട്ടികയിലുള്ള മുടിയേറ്റ്, ജനുവരി എട്ടിന് സംസ്ഥാന മുഖ്യമന്ത്രി വി ഡി സതീശൻ ഉദ്ഘാടനം ചെയ്യുന്ന മൂന്നു ദിവസത്തെ അന്തർദേശീയ വേദിക് സെമിനാറിൽ വിദേശ പ്രതിനിധികൾ പങ്കെടുക്കും. മറ്റു ദിവസങ്ങളിൽ വിവിധ ഭജൻസിന്റെ പരിപാടികൾ, ഡിജിറ്റൽ മൂവി മാറ്റിക്ക് ബാലെ, ദീപ പാലനാട്ട് നയിക്കുന്ന സ്ത്രീകളുടെ കഥകളി,ജഡായു വധം കൂടിയാട്ടം, മോഹിനിയാട്ടം, പൂതന മോക്ഷം നങ്ങ്യാർകൂത്ത്, കഥകളി, ഓട്ടൻതുള്ളൽ, ഭക്തിഗാനമേള, തിരുവാതിരക്കളി, ഗുരുകുലം നാരായണത്ത് മനയുടെ നേതൃത്വത്തിൽ ചമ്രവട്ടം ജംഗ്ഷൻ മുതൽ ഇടത്താവളത്തിലേക്ക് ദീപ പ്രയാണം തുടങ്ങി നിരവധി കലാപരിപാടികളാണ് ഇത്തവണ കണ്ട കുറുംബക്കാവ് ഇടത്താവളത്തിൽ അരങ്ങേറുന്നത്.