ഡൽഹി: മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് സിജെപി നാളെ ഡൽഹിയിൽ പ്രതിഷേധസമരം സംഘടിപ്പിക്കുന്നു. ജന്തർ മന്ദറിലേക്ക് രാവിലെ 10 മണിക്ക് എല്ലാവരും എത്തിച്ചേരണമെന്നാണ് സിജെപിയുടെ ആഹ്വാനം. ‘ജനാധിപത്യത്തെ രക്ഷിക്കാനുള്ള അന്തിമവിളി’ (ഫൈനൽ കാൾ ടു സേവ് ഡെമോക്രസി) എന്നാണ് ഈ പ്രതിഷേധത്തെ സിജെപി വിശേഷിപ്പിച്ചിരിക്കുന്നത്.
അതേസമയം, സിജെപി സമരത്തെ നേരിടാൻ ശക്തമായ നടപടികളോടെ ഡൽഹി പൊലീസും രംഗത്തെത്തി. ജന്തർ മന്തറിൽ നടത്താൻ നിശ്ചയിച്ച പ്രതിഷേധത്തിന് പൊലീസ് അനുമതി നിഷേധിച്ചു. മുൻകാലങ്ങളിലെ ക്രമസമാധാന പ്രശ്നങ്ങളും സുരക്ഷയെയും ഗതാഗതത്തെയും ബാധിക്കാനുള്ള സാധ്യതയും ചൂണ്ടിക്കാട്ടിയാണ് പൊലീസ് പ്രതിഷേധത്തിന് അനുമതി നിഷേധിച്ചത്. അനുമതിയില്ലാതെ ആളുകൾ കൂട്ടംകൂടുന്നത് തടയാനും ക്രമസമാധാന നില ഉറപ്പാക്കാനുമായി ഡൽഹി, സെൻട്രൽ ഡൽഹി മേഖലകളിലും അതിർത്തികളിലുമായി ഇരുപതിനായിരത്തിലേറെ സുരക്ഷാ ഉദ്യോഗസ്ഥരെയാണ് വിന്യസിച്ചിരിക്കുന്നത്. പ്രതിഷേധക്കാരെ പാർപ്പിക്കുന്നതിനായി 12 താൽക്കാലിക തടങ്കൽ കേന്ദ്രങ്ങളും സജ്ജമാക്കി.
വിലക്ക് മറികടന്ന് സിജെപി പ്രവർത്തകർ തലസ്ഥാനത്തേക്ക് കടക്കാൻ സാധ്യതയുണ്ടെന്ന രഹസ്യാന്വേഷണ വിവരങ്ങളുടെ പശ്ചാത്തലത്തിൽ, കേന്ദ്ര ആഭ്യന്തര സെക്രട്ടറി ഗോവിന്ദ് മോഹൻ എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും പൊലീസ് മേധാവിമാർക്ക് കത്തയച്ചു. ഡൽഹി പൊലീസുമായും രഹസ്യാന്വേഷണ ഏജൻസികളുമായും അതിർത്തി നിരീക്ഷണ വിഭാഗങ്ങളുമായും ഏകോപനം ശക്തമാക്കാനും ആവശ്യമായ മുൻകരുതലുകൾ സ്വീകരിക്കാനും കത്തിൽ നിർദേശിക്കുന്നു.
ജന്തർ മന്തർ, ജൻപഥ്,തെരഞ്ഞെടുപ്പ് കമ്മീഷൻ, ഡൽഹി പൊലീസ് ആസ്ഥാനം എന്നിവ ഉൾപ്പെടുന്ന ഒന്നര കിലോമീറ്റർ ചുറ്റളവ് അതീവ സുരക്ഷാ മേഖലയായി പ്രഖ്യാപിച്ചു. ഈ മേഖലയിൽ മാത്രം 6,500ലധികം സുരക്ഷാ ഉദ്യോഗസ്ഥരെ നിയോഗിച്ചിട്ടുണ്ട്. ജന്തർ മന്തറിലേക്കുള്ള റോഡുകളിൽ ഏഴ് അടിയോളം വരുന്ന മൾട്ടി-ലെയർ ബാരിക്കേഡുകളാണ് സ്ഥാപിച്ചിരിക്കുന്നത്. പ്രതിഷേധത്തിന് അനുമതിയില്ലെന്നും മുദ്രാവാക്യം വിളിക്കുകയോ പൊതുമുതൽ നശിപ്പിക്കുകയോ പൊലീസിനെ ആക്രമിക്കുകയോ ചെയ്യരുതെന്നും വ്യക്തമാക്കുന്ന റെക്കോർഡ് ചെയ്ത അറിയിപ്പുകൾ ഉച്ചഭാഷിണികളിലൂടെ നിരന്തരം നൽകുന്നുണ്ട്.
അനുമതിയില്ലാതെ എത്തുന്ന പ്രതിഷേധക്കാരെ കസ്റ്റഡിയിലെടുത്ത് പ്രത്യേക തടങ്കൽ കേന്ദ്രങ്ങളിലേക്ക് മാറ്റും. പ്രകോപനങ്ങളിൽ വീഴാതെ അതീവ സംയമനം പാലിക്കാനും പ്രൊഫഷണലായി സാഹചര്യങ്ങൾ കൈകാര്യം ചെയ്യാനും സുരക്ഷാ ഉദ്യോഗസ്ഥർക്ക് കർശന നിർദേശം നൽകിയിട്ടുണ്ട്. മാധ്യമപ്രവർത്തകരെന്ന വ്യാജേനയെത്തി പ്രകോപനമുണ്ടാക്കാൻ ശ്രമിക്കുന്നവർക്കെതിരെ സാഹചര്യങ്ങൾക്കനുസരിച്ച് നിയമനടപടി സ്വീകരിക്കുമെന്നും അധികൃതർ വ്യക്തമാക്കി.
നിരീക്ഷണത്തിനായി ഡൽഹിയിലെ പ്രധാന കേന്ദ്രങ്ങളിൽ ശബ്ദവും ദൃശ്യവും പകർത്താൻ ശേഷിയുള്ള മുന്നൂറിലേറെ സിസിടിവി ക്യാമറകൾ സ്ഥാപിച്ചിട്ടുണ്ട്.അഡീഷണൽ പൊലീസ് കമ്മീഷണർ റാങ്കിലുള്ളവർ ഉൾപ്പെടെയുള്ള മുതിർന്ന ഉദ്യോഗസ്ഥർക്ക് ബോഡി ക്യാമറകൾ നൽകിയിട്ടുണ്ട്.ഇതിനു പുറമെ,പൊലീസിന്റെ നടപടികളും പ്രതിഷേധങ്ങളും കൃത്യമായി രേഖപ്പെടുത്തുന്നതിനായി നൂറോളം ഫോട്ടോഗ്രാഫർമാരെയും വീഡിയോഗ്രാഫർമാരെയും നിയോഗിച്ചു.
ഡൽഹിയിലെ റസിഡന്റ് വെൽഫെയർ അസോസിയേഷനുകൾ, കമ്മ്യൂണിറ്റി സെന്ററുകൾ, പള്ളികൾ എന്നിവ കേന്ദ്രീകരിച്ച് ബോധവൽക്കരണവും പൊലീസ് നടത്തുന്നുണ്ട്. ഹോട്ടലുകൾ, ലോഡ്ജുകൾ, എയർബിഎൻബി (Airbnb) ഹോംസ്റ്റേകൾ എന്നിവിടങ്ങളിൽ പരിശോധന കർശനമാക്കി.അതേസമയം, പ്രതിഷേധം രാംലീല മൈതാനത്തേക്ക് മാറ്റുന്നതുമായി ബന്ധപ്പെട്ട് സംഘാടകരിൽ നിന്ന് അപേക്ഷയൊന്നും ലഭിച്ചിട്ടില്ലെന്നും അപേക്ഷ ലഭിച്ചാൽ മാത്രമേ പരിശോധിച്ചു തീരുമാനമെടുക്കൂ എന്നും ഡൽഹി പൊലീസ് വ്യക്തമാക്കി
