എടപ്പാൾ : ബൈക്ക് യാത്രികരുടെ ദേഹത്തേക്ക് വൈദ്യുതി കമ്പി പൊട്ടിവീണ് രണ്ട് പേർക്ക് പരിക്കേറ്റു. മാണൂർ തത്തംപാടത്ത് ഉമ്മറിന്റെ മകൻ സഹൽ (22), ആനക്കര സ്വദേശി മാരാത്ത് വളപ്പിൽ ലത്തീഫ് (26) എന്നിവർക്കാണ് പരിക്കേറ്റത്. വെള്ളിയാഴ്ച രാവിലെ 11 മണിയോടെ മാണൂർ അങ്ങാടി–ഈസ്റ്റ് മാണൂർ റോഡിലാണ് സംഭവം. എടപ്പാളിലെ സ്വകാര്യ സ്ഥാപനത്തിലേക്ക് ജോലിക്ക് പോകുന്നതിനിടെയാണ് ഇവർ സഞ്ചരിച്ചിരുന്ന ബൈക്കിന് മുകളിലേക്ക് വൈദ്യുതി ലൈൻ പൊട്ടിവീണത്.
വൈദ്യുതാഘാതമേറ്റ ലത്തീഫിനെ രക്ഷിക്കുന്നതിനിടെ സഹലിനും വൈദ്യുതി പിടികൂടുകയായിരുന്നു. ലത്തീഫിന്റെ കൈയിലുണ്ടായിരുന്ന ലെതർ ബാഗ് ഉപയോഗിച്ച് വൈദ്യുതി കമ്പിയിൽ അടിച്ചാണ് സഹലിനെ രക്ഷപ്പെടുത്തിയത്. ശബ്ദം കേട്ടെത്തിയ നാട്ടുകാർ ഇരുവരെയും ആദ്യം മാണൂരിലെ ആശുപത്രിയിലും തുടർന്ന് എടപ്പാളിലെ സ്വകാര്യ ആശുപത്രിയിലും പ്രവേശിപ്പിച്ചു.
കെഎസ്ഇബി ഉദ്യോഗസ്ഥർ സ്ഥലത്തെത്തി പരിശോധന നടത്തി.
