തവനൂർ: പൊന്നാനി ബ്ലോക്ക് പഞ്ചായത്തിന്റെ 2026-2027 വാർഷിക ജനകീയാസൂത്രണ പദ്ധതിയിൽ ഉൾപ്പെടുത്തി സംഘടിപ്പിച്ച ‘ലിറ്റിൽ സയന്റിസ്റ്റ് – ശാസ്ത്രയാൻ’ കുട്ടികളുടെ ശാസ്ത്ര പഠന കോൺഗ്രസിന് തവനൂരിൽ സമാപനമായി. സെപ്റ്റംബർ 19, 20, 21 തീയതികളിലായി തവനൂർ കെ.എം.ജി.യു.പി സ്കൂളിൽ വെച്ചാണ് മൂന്ന് ദിവസം നീണ്ടുനിന്ന ക്യാമ്പ് നടന്നത്.
ബ്ലോക്ക് പഞ്ചായത്ത് പരിധിയിലെ നാല് പഞ്ചായത്തുകളിലെ വിവിധ സ്കൂളുകളിൽ നിന്നായി തിരഞ്ഞെടുക്കപ്പെട്ട 55 വിദ്യാർഥികളാണ് ക്യാമ്പിൽ പങ്കെടുത്തത്. വൈവിധ്യമാർന്ന നിരവധി ശാസ്ത്ര പഠന സെഷനുകൾ മൂന്ന് ദിവസങ്ങളിലായി വിദ്യാർഥികൾക്കായി ഒരുക്കിയിരുന്നു.
സമാപന സമ്മേളനത്തിന്റെ ഉദ്ഘാടനം പൊന്നാനി ബ്ലോക്ക് പഞ്ചായത്ത് പ്രസിഡന്റ് അഡ്വ. ആർ. ഗായത്രി നിർവഹിച്ചു. വരുംതലമുറയെ കൃത്യമായ ശാസ്ത്ര അവബോധമുള്ളവരാക്കി വളർത്തിയെടുക്കുക എന്നതാണ് ബ്ലോക്ക് പഞ്ചായത്തിന്റെ ആത്യന്തിക ലക്ഷ്യമെന്ന് പ്രസിഡന്റ് തന്റെ ഉദ്ഘാടന പ്രസംഗത്തിൽ പറഞ്ഞു.ചടങ്ങിൽ ബ്ലോക്ക് വൈസ് പ്രസിഡന്റ് എ.പി. വിമൽ അധ്യക്ഷത വഹിച്ചു. ബ്ലോക്ക് സെക്രട്ടറി മഞ്ജുഷ കെ.എസ്. സ്വാഗതം ആശംസിച്ചു. തവനൂർ ഗ്രാമപഞ്ചായത്ത് പ്രസിഡന്റ് അബൂബക്കർ സിദ്ദിഖ് സി.വി., ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ പത്മജ ടി., ബ്ലോക്ക് അംഗങ്ങളായ അബ്ദുൽ നാസർ, നൗഫൽ പി.പി., ഫർഹാന, കെ.എം.ജി.യു.പി.എസ്. ഹെഡ്മാസ്റ്റർ സന്തോഷ് എന്നിവർ ചടങ്ങിൽ ആശംസകൾ നേർന്നു സംസാരിച്ചു. ക്യാമ്പ് കോർഡിനേറ്റർ സജികുമാർ പി.വി. പരിപാടിക്ക് നന്ദി രേഖപ്പെടുത്തി.
