പൊന്നാനി: കണ്ണൂരിൽ നടന്ന 68-ാമത് സംസ്ഥാന സ്കൂൾ ഗെയിംസ് തൈഖോണ്ടോ ചാമ്പ്യൻഷിപ്പിൽ പൊന്നാനി ഐ.എസ്.എസ്. ഹയർ സെക്കൻഡറി സ്കൂൾ ഓവറോൾ ചാമ്പ്യന്മാരായി. നാല് സ്വർണവും മൂന്ന് വെള്ളിയും മൂന്ന് വെങ്കലവും ഉൾപ്പെടെ 32 പോയിന്റ് നേടിയാണ് സ്കൂൾ ഈ മികച്ച നേട്ടം കൈവരിച്ചത്.
സബ്ജൂനിയർ വിഭാഗത്തിൽ എം.എ. മുഹമ്മദ് ഷാഹിൽ, പി.വി. മുഹമ്മദ് ഹനീൻ, റെബിൻ മുഹമ്മദ് വി.പി. എന്നിവരും ജൂനിയർ വിഭാഗത്തിൽ എ.വി. സിനാസും സ്വർണം നേടി. പി.പി. ഹൈഫ, ഹനീൻ മുബാറക്, ഷെസ അഫ്റീൻ എന്നിവർ വെള്ളിയും പി.പി. ഇസ്സ, എ.കെ. നിലൂഫർ, ഷയാൻ മൂസ എന്നിവർ വെങ്കല മെഡലുകളും കരസ്ഥമാക്കി.
വിജയികളായ വിദ്യാർഥികളെയും പരിശീലകരായ പി.പി. ഫൈസൽ, പി.എ. ദിൽബർ എന്നിവരെയും സ്കൂളിൽ സംഘടിപ്പിച്ച ചടങ്ങിൽ അനുമോദിച്ചു. സ്കൂൾ ഗ്രൗണ്ടിൽ നടന്ന സംഗമം പൊന്നാനി എം.എൽ.എ. കെ.പി. നൗഷാദ് അലി ഉദ്ഘാടനം ചെയ്തു. പി.വി. അബ്ദുൽ ലത്തീഫ് അധ്യക്ഷത വഹിച്ച ചടങ്ങിൽ എം. മുഹമ്മദ് അബ്ദുൽ നാസർ, ഫസീല, പി.കെ. അബ്ദുൽ അസീസ്, പി.വി. അബ്ദുൽ ഖാദർ, പി. ഗീത, കെ.വി. മുഹമ്മദ് റിയാസ് തുടങ്ങിയവർ സംസാരിച്ചു. ചടങ്ങിനുശേഷം വിദ്യാർഥികളുടെ വിജയാഹ്ലാദ റാലിയും നടന്നു.
