തിരുവനന്തപുരം: അവധിക്കാലത്തോ മറ്റ് ആവശ്യങ്ങൾക്കോ വീടുകൾ പൂട്ടിയിട്ട് യാത്രചെയ്യുന്നവർക്ക് വലിയൊരാശ്വാസമാവുകയാണ് കേരള പൊലീസിന്റെ സുരക്ഷാ സംവിധാനം. പൊലീസിന്റെ ഔദ്യോഗിക മൊബൈൽ ആപ്പായ പോൽ-ആപ്പ് (POL-APP) വഴി യാത്ര പോകുന്ന വിവരം മുൻകൂട്ടി അറിയിച്ചാൽ വീട്ടിലും പരിസരത്തും പ്രത്യേക പൊലീസ് നിരീക്ഷണം ഏർപ്പെടുത്തും. സംസ്ഥാനത്ത് ഇതിനോടകം 31,188 പേരാണ് സുരക്ഷയുടെ ഈ സൗകര്യം പ്രയോജനപ്പെടുത്തിയിട്ടുള്ളത്.
എങ്ങനെ അപേക്ഷിക്കാം?
പ്ലേ സ്റ്റോറിൽ നിന്നോ ആപ്പ് സ്റ്റോറിൽ നിന്നോ പോൽ-ആപ്പ് ഡൗൺലോഡ് ചെയ്ത ശേഷം, അതിലെ ‘ലോക്ക്ഡ് ഹൗസ് ഇൻഫർമേഷൻ’ എന്ന വിഭാഗത്തിലാണ് ഇതിനായി അപേക്ഷ നൽകേണ്ടത്. സാധാരണക്കാർക്കും വളരെ ലളിതമായി ഉപയോഗിക്കാൻ സാധിക്കുന്ന രീതിയിലാണ് ഈ ആപ്പ് സജ്ജീകരിച്ചിരിക്കുന്നത്.
ശ്രദ്ധിക്കേണ്ട പ്രധാന കാര്യങ്ങൾ
സമയപരിധി: യാത്ര പുറപ്പെടുന്നതിന് 48 മണിക്കൂർ മുമ്പെങ്കിലും വിവരം ആപ്പിലൂടെ നൽകിയിരിക്കണം. പരമാവധി ഏഴു ദിവസം മുമ്പുവരെ അപേക്ഷ സമർപ്പിക്കാവുന്നതാണ്
നൽകേണ്ട വിവരങ്ങൾ: യാത്രപോകുന്ന ദിവസങ്ങൾ, വീടിന്റെ ഫോട്ടോ, സ്ഥിതിചെയ്യുന്ന സ്ഥലം, കൃത്യമായ വിലാസം, അടുത്ത ബന്ധുവിന്റെയോ അയൽവാസിയുടെയോ പേരും ഫോൺ നമ്പറും എന്നിവ ആപ്പിൽ നൽകേണ്ടതുണ്ട്
നിരീക്ഷണ കാലാവധി: പരമാവധി 14 ദിവസം വരെയാണ് വീടും പരിസരവും പൊലീസിന്റെ പ്രത്യേക നിരീക്ഷണത്തിലുണ്ടാവുക. 14 ദിവസത്തിലധികം തുടർച്ചയായി ഈ സേവനം ആവശ്യമായി വരികയാണെങ്കിൽ ആപ്പിലൂടെ പുതിയ അപേക്ഷ സമർപ്പിക്കണം
രാജ്യത്തെ ഏറ്റവും മികച്ച ജനപ്രിയ ആപ്പുകളിൽ ഒന്നായി മാറിയ കേരള പൊലീസിന്റെ ഈ പോൽ-ആപ്പ് ഇതിനോടകം 17 ലക്ഷത്തോളം ആളുകൾ ഡൗൺലോഡ് ചെയ്തുകഴിഞ്ഞു. ഏറെ ഉപകാരപ്രദമായ ഈ സുരക്ഷാ ആപ്പ് എല്ലാവരും അവരവരുടെ മൊബൈൽ ഫോണുകളിൽ ഡൗൺലോഡ് ചെയ്യണമെന്ന് കേരള പൊലീസ് അഭ്യർഥിച്ചു.
