ന്യൂഡൽഹി: രാജ്യത്തെ പ്രമുഖ മദ്യക്കമ്പനികളായ യുണൈറ്റഡ് സ്പിരിറ്റ്സ്, ഇൻബ്രൂ ബിവറേജസ്, മോഹൻ റോക്കി സ്പ്രിങ് വാട്ടർ എന്നിവ നിർമ്മിക്കുന്ന വിസ്കി, റം ബ്രാൻഡുകളുടെ ചില വേരിയന്റുകളുടെ വിൽപന ഭക്ഷ്യ സുരക്ഷാ അതോറിറ്റി (എഫ്എസ്എസ്എഐ) നിരോധിച്ചു. മദ്യത്തിൽ കൃത്രിമ രുചിക്കൂട്ടുകൾ ചേർത്തതായി കണ്ടെത്തിയതിനെത്തുടർന്നാണ് ഈ നടപടി. ലബോറട്ടറി പരിശോധനകളിൽ ചില നിർമ്മാണ യൂണിറ്റുകൾ റമ്മിന്റെ ഫ്ലേവറും വിസ്കിയുടെ ഫ്ലേവറും പ്രത്യേകം ചേർക്കുന്നതായി കണ്ടെത്തിയതായി റോയിട്ടേഴ്സ് റിപ്പോർട്ട് ചെയ്തു.യുണൈറ്റഡ് സ്പിരിറ്റ്സിന്റെ ആന്റിക്വിറ്റി ബ്ലൂ വിസ്കി, റോയൽ ചലഞ്ച് വിസ്കി, ഇൻബ്രൂ ബിവറേജസിന്റെ ബാഗ്പൈപ്പർ ഡീലക്സ് വിസ്കി, ഓൾഡ് കാസ്ക് ഡീലക്സ് ട്രിപ്പിൾ എക്സ് റം എന്നിവയ്ക്കാണ് പ്രധാനമായും നിരോധനം ഏർപ്പെടുത്തിയിരിക്കുന്നത്. കൂടാതെ മഹാരാഷ്ട്രയിലെ മോഹൻ റോക്കി സ്പ്രിങ് വാട്ടർ നിർമ്മിക്കുന്ന പ്രശസ്തമായ ഓൾഡ് മങ്ക് റമ്മിന്റെ മൂന്ന് വേരിയന്റുകൾക്കും നിരോധനമുണ്ട്. തിരിച്ചറിഞ്ഞ നിർമ്മാണ യൂണിറ്റുകളിൽ നിർമ്മിക്കുന്ന ഉൽപ്പന്നങ്ങൾക്കാണോ അതോ ഈ ബ്രാൻഡുകൾക്ക് രാജ്യത്തുടനീളം നിരോധനം ബാധകമാണോ എന്ന കാര്യത്തിൽ നിലവിൽ വ്യക്തത വന്നിട്ടില്ല.
റമ്മിൽ റം ഫ്ലേവറോ വിസ്കിയിൽ വിസ്കി ഫ്ലേവറോ ചേർക്കുന്ന രീതിക്ക് അന്താരാഷ്ട്ര തലത്തിൽ അംഗീകാരമില്ലെന്ന് അധികൃതർ വ്യക്തമാക്കി. ഈ ഉൽപ്പന്നങ്ങളിൽ കൃത്രിമ ചേരുവകൾ കണ്ടെത്തിയതിനാൽ ഇവയെ ഗുണനിലവാരമില്ലാത്തവ എന്ന വിഭാഗത്തിലാണ് പെടുത്തിയിരിക്കുന്നത്. മദ്യത്തിന്റെ ഉത്പാദന പ്രക്രിയയിൽ അത്യാവശ്യമായ മൊളാസസ് അല്ലെങ്കിൽ മാൾട്ട് തുടങ്ങിയ സ്വാഭാവിക അസംസ്കൃത വസ്തുക്കളുടെ ഉപയോഗം എന്നിവ ഒഴിവാക്കാനാണ് നിർമ്മാതാക്കൾ ഇത്തരം കുറുക്കുവഴികൾ തേടുന്നതെന്നും അതോറിറ്റി ആരോപിക്കുന്നു. അടുത്തിടെ പെപ്സി, റെഡ് ബുൾ തുടങ്ങിയ കമ്പനികളുടെ എതിർപ്പുകൾക്കിടയിലും, ഉയർന്ന കഫീൻ അടങ്ങിയ പാനീയങ്ങളെ ‘എനർജി ഡ്രിങ്ക്സ്’ എന്ന് വിളിക്കുന്നത് നിർത്താൻ അതോറിറ്റി കർശന നിർദ്ദേശം നൽകിയിരുന്നു.
