2026-27 ലെ ഇന്ത്യൻ ഫുട്ബോൾ ലീഗ് സീസൺ 2026 ഒക്ടോബർ 16 ന് ആരംഭിക്കുമെന്ന് ഓൾ ഇന്ത്യ ഫുട്ബോൾ ഫെഡറേഷൻ. കഴിഞ്ഞ ദിവസം ന്യൂഡൽഹിയിലെ ഫുട്ബോൾ ഹൗസിൽ നടന്ന യോഗത്തിലാണ് എഐഎഫ്എഫ് ഇത് സംബന്ധിച്ച വിവരം പ്രഖ്യാപിച്ചത്. ഐസ്വാൾ എഫ്സി, എഫ്സി ബെംഗളൂരു യുണൈറ്റഡ്, ചാൻമാരി എഫ്സി, ഡൽഹി എഫ്സി, ഡെംപോ എസ്സി, ഗോകുലം കേരള എഫ്സി, രാജസ്ഥാൻ യുണൈറ്റഡ് എഫ്സി, റിയൽ കശ്മീർ എഫ്സി, ഷില്ലോങ് ലജോങ് എഫ്സി, ശ്രീനിധി ഡെക്കാൻ എഫ്സി എന്നീ 10 ക്ലബ്ബുകളാണ് യോഗത്തിൽ പങ്കെടുത്തത്. ഇന്ത്യൻ സൂപ്പർ ലീഗിൽ നിന്നും തരംതാഴ്ന്ന മുഹമ്മദൻ സ്പോർട്ടിംഗ് ക്ലബ് യോഗത്തിൽ പങ്കെടുത്തില്ല.
അതേ സമയം, അടുത്ത സീസൺ മുതൽ ഇന്ത്യൻ താരങ്ങൾക്ക് കൂടുതൽ അവസരം നൽകാനായി ഒരു ടീമിന്റെ ആദ്യ ഇലവനിൽ വിദേശ കളിക്കാരുടെ എണ്ണം കുറച്ച് മൂന്നാക്കുമെന്ന് എഐഎഫ്എഫ് ഡെപ്യൂട്ടി സെക്രട്ടറി ജനറൽ എം സത്യനാരായണൻ വ്യക്തമാക്കി. കഴിഞ്ഞ സീസണിൽ ആദ്യ ഇലവനിൽ നാല് വിദേശ താരങ്ങൾക്കാണ് അവസരം ഉണ്ടായിരുന്നത്.
കഴിഞ്ഞ സീസൺ വളരെ കുറഞ്ഞ ബജറ്റിൽ നടത്താൻ കഴിഞ്ഞതിൽ ക്ലബ്ബുകൾ സന്തുഷ്ടരാണെന്ന് സത്യനാരായണൻ പറഞ്ഞു. 2026-27 സീസൺ വിജയകരമാക്കുന്നതിന് ഞങ്ങൾ ഒരുമിച്ച് പ്രവർത്തിക്കുമെന്നും അദ്ദേഹം കൂട്ടിച്ചേർത്തു
