ചാലിശ്ശേരിയിൽ നിന്ന് ഉപജീവനത്തിനായി എറണാകുളത്തെത്തിയ 29 കുടുംബങ്ങൾ, തങ്ങളെചേർത്തുപിടിച്ച നഗരത്തോട് നന്ദി കപറയാൻ തിരഞ്ഞെടുത്ത കാരുണ്യത്തിന്റെ വഴി മാതൃകയായി. സ്വന്തം നാടിനേയും ഒപ്പം അന്നം തരുന്ന നഗരത്തെ കരുതുക എന്ന ആശയത്തിൽ 25 വർഷമായി ജീവകാരുണ്യ പ്രവർത്തനങ്ങൾ നടത്തി മാതൃകയായിരിക്കുകയാണ് ചാലിശ്ശേരി സെന്റ് പീറ്റേഴ്സ് ആൻഡ് സെന്റ് പോൾസ് യാക്കോബായ സുറിയാനിപള്ളിയുടെ കീഴിലുള്ള എറണാകുളം കുടുംബ യൂണിറ്റ്.സിൽവർ ജൂബിലി ആഘോഷങ്ങളോടനുബന്ധിച്ച് സംഘടിപ്പിച്ച സാന്ത്വന സ്പർശം–2026 കാരുണ്യ പദ്ധതികളുടെ ഉദ്ഘാടനം എറണാകുളം എം.പി ഹൈബി ഈഡൻ നിർവഹിച്ചു.
ബൈബിളിലെ വാക്കുകൾ പ്രവർത്തിയിലൂടെ യാഥാർഥ്യമാക്കിയിരിക്കുന്ന കുടുംബ യൂണിറ്റിന്റെ സേവനങ്ങൾ സമൂഹത്തിന് പ്രചോദനമാണെന്ന് ഹൈബി ഈഡൻ പറഞ്ഞു.ഡയാലിസിസ്,കാൻസർ ,ഉൾപ്പെടെയുള്ള ഗുരുതര രോഗങ്ങൾ നേരിടുന്നവർക്ക് വർഷങ്ങളായി കൈത്താങ്ങാകുന്ന പ്രവർത്തനങ്ങൾ അനേകം കുടുംബങ്ങൾക്ക് പ്രതീക്ഷയും ആശ്വാസവും നൽകിയിട്ടുണ്ടെന്ന് എം.പി കൂട്ടിച്ചേർത്തു.തൃശൂർ ഭദ്രാസനാധിപൻ കുര്യാക്കോസ് മോർ ക്ലീമീസ് അധ്യക്ഷത വഹിച്ചു.ഡയാലിസിസ്,കാൻസർ, മറ്റ് ചികിത്സകൾക്കുള്ള ധനസഹായങ്ങൾ ഹൈബി ഈഡൻ എം.പി, ഇടവക വികാരി ഫാ.അബ്രഹാം യാക്കോബ് പൂവ്വത്ത്മണ്ണിൽ, എറണാകുളം എം.എൽ.എ ടി.ജെ. വിനോദ്, കൊച്ചി സിറ്റി മുൻ ഡി.സി.പി ഷാജു വർഗീസ് എന്നിവർ ചേർന്ന് വിതരണം ചെയ്തു.ചടങ്ങിൽ മാധ്യമപ്രവർത്തകൻ എ.സി. ഗീവർ ചാലിശ്ശേരിയെ ടി.ജെ. വിനോദ് എം.എൽ.എ പൊന്നാടയും ഉപഹാരവും നൽകി ആദരിച്ചു.യൂണിറ്റിന്റെ വളർച്ചയിൽ നിർണായക പങ്കുവഹിച്ച വൈസ് പ്രസിഡന്റ് പി.കെ. ജിജു, 25 വർഷമായി സെക്രട്ടറിയായി സേവനമനുഷ്ഠിക്കുന്ന പി.കെ. ശാമു, ദീർഘകാല ട്രഷറർ എ.ഐ. ഡേവീഡ് ,പൊതുപരീക്ഷകളിൽ ഉന്നത വിജയം നേടിയ വിദ്യാർഥികളെയും ആദരിച്ചു.ഫാ. ഡിൽജോ ഏലിയാസ്, പി.കെ. ജിജു, പി.കെ. ശാമു, സി.വി. ബാബു, എ.ഐ. ഡേവീഡ് , എ . സി ഗീവർ ചാലിശ്ശേരി എന്നിവർ സംസാരിച്ചു
