മഴക്കാല മുന്നൊരുക്കം:ചങ്ങരംകുളം–തൃശൂർ റൂട്ടിൽ ഡ്രൈനേജ് ശുചീകരണം നടത്തി

ചങ്ങരംകുളം :മഴക്കാലം ശക്തമാകുന്ന സാഹചര്യത്തിൽ വെള്ളക്കെട്ടും ഗതാഗത തടസങ്ങളും ഒഴിവാക്കുന്നതിനായി ചങ്ങരംകുളം–തൃശൂർ സംസ്ഥാനപാതയിൽ മാർസ് തീയറ്റർ വരെയുള്ള ഭാഗത്തെ ഡ്രൈനേജ് സംവിധാനങ്ങൾ ശുചീകരിച്ചു.ആലംകോട് ഗ്രാമപഞ്ചായത്തും പൊതുമരാമത്ത് വകുപ്പ് അധികൃതരും സംയുക്തമായാണ് ശുചീകരണ പ്രവർത്തനങ്ങൾ നടത്തിയത്.റോഡരികിലെ ഓടകളിലും കലുങ്കുകളിലും അടിഞ്ഞുകൂടിയിരുന്ന മണ്ണ്, മാലിന്യങ്ങൾ, പ്ലാസ്റ്റിക് അവശിഷ്ടങ്ങൾ എന്നിവ നീക്കം ചെയ്ത് മഴവെള്ളം സുഗമമായി ഒഴുകിപ്പോകുന്നതിനുള്ള സൗകര്യം ഒരുക്കി. മഴക്കാലത്ത് പതിവായി അനുഭവപ്പെടുന്ന വെള്ളക്കെട്ട്, റോഡ് തകർച്ച, യാത്രാദുരിതം തുടങ്ങിയ പ്രശ്നങ്ങൾ പരിഹരിക്കുക എന്ന ലക്ഷ്യത്തോടെയാണ് നടപടി സ്വീകരിച്ചതെന്ന് ബന്ധപ്പെട്ടവർ അറിയിച്ചു.പ്രധാന ജംഗ്ഷനുകൾ,വ്യാപാര സ്ഥാപനങ്ങൾ കൂടുതലുള്ള പ്രദേശങ്ങൾ,ജനസാന്ദ്രതയേറിയ മേഖലകൾ എന്നിവയ്ക്ക് മുൻഗണന നൽകിയാണ് ശുചീകരണ പ്രവർത്തനങ്ങൾ പൂർത്തിയാക്കിയത്.മഴക്കാലത്ത് പൊതുജനങ്ങൾക്ക് സുരക്ഷിതമായ യാത്രാസൗകര്യം ഉറപ്പാക്കുന്നതിനും റോഡിലെ വെള്ളക്കെട്ട് ഒഴിവാക്കുന്നതിനും ഈ പ്രവർത്തനം സഹായകരമാകുമെന്ന് അധികൃതർ അറിയിച്ചു.