ആരാധകർ ആകാംക്ഷയോടെ കാത്തിരിക്കുന്ന മമ്മൂട്ടി – മോഹൻലാൽ ചിത്രം പേട്രിയറ്റ് ഇന്ന് തിയേറ്ററുകളിൽ. 13 വർഷങ്ങൾക്കുശേഷം മമ്മൂട്ടിയെയും മോഹൻലാലിനെയും ഒരുമിച്ച് ഒരേ സ്ക്രീനിൽ കാണാനുള്ള കാത്തിരിപ്പിലാണ് ആരാധകർ. മഹാനടന്മാർക്കൊപ്പം കുഞ്ചാക്കോ ബോബൻ, ഫഹദ് ഫാസിൽ തുടങ്ങിയ താരങ്ങളും ചിത്രത്തിൽ അണിനിരക്കുന്നുണ്ട്. പേട്രിറ്റിൻ്റെ ടിക്കറ്റുകൾ ചൂടപ്പം പോലെയാണ് അഡ്വാൻസ് ബുക്കിങ്ങിൽ തന്നെ വിറ്റുപോയത്.
മഹേഷ് നാരായണൻ സംവിധാനം ചെയ്ത ഈ സ്പൈ ആക്ഷൻ ത്രില്ലർ മലയാള സിനിമയിലെ എക്കാലത്തെയും വലിയ റിലീസുകളിലൊന്നാണ്. തിയേറ്ററുകളിൽ എത്തുന്നതിന് മുൻപേ തന്നെ ‘പേട്രിയറ്റ്’ ബോക്സ് ഓഫീസിൽ തരംഗമായിരുന്നു. റെക്കോർഡ് അഡ്വാൻസ് ബുക്കിങ്ങാണ് ചിത്രത്തിന് ലഭിച്ചത്. ചിത്രത്തിന്റെ ആഗോള പ്രീ-സെയിൽസ് ബുക്കിങ് ഇതിനോടകം 6 കോടി രൂപ പിന്നിട്ടതായാണ് വിവരം. ബുക്ക് മൈ ഷോയിലും ട്രെൻഡിങ് ലിസ്റ്റിൽ ഒന്നാമതെത്താൻ ‘പേട്രിയറ്റി’നായി.
ഒരു പതിറ്റാണ്ടിന് ശേഷമാണ് ബിഗ് സ്ക്രീനിൽ മമ്മൂട്ടിയും മോഹൻലാലും മുഴുനീള വേഷങ്ങളിൽ ഒന്നിക്കുന്നത് എന്നത് തന്നെയാണ് ആരാധകരെ ത്രസിപ്പിക്കുന്ന ഘടകം. ഡോ. ഡാനിയൽ ജെയിംസായി മമ്മൂട്ടിയും കേണൽ റഹീം നായിക്കായി മോഹൻലാലും തിരശീലയിൽ അത്ഭുതം വിരിയിക്കുമെന്ന പ്രതീക്ഷയിലാണ് ആരാധകർ.
ഫഹദ് ഫാസിൽ, കുഞ്ചാക്കോ ബോബൻ എന്നിവരെ കൂടാതെ നയൻതാര, രേവതി, രാജീവ് മേനോൻ എന്നിവരും ഈ ചിത്രത്തിൽ പ്രധാന വേഷങ്ങളിലുണ്ട്. ആന്റോ ജോസഫ് ഫിലിം കമ്പനി, കിച്ചപ്പു ഫിലിംസ് എന്നിവയുടെ ബാനറിൽ ആന്റോ ജോസഫ്, കെ ജി അനിൽകുമാർ എന്നിവർ ചേർന്നാണ് നിർമാണം
