‘പാട്രിയേറ്റ്’ റിലീസിനു മണിക്കൂറുകൾക്കു മുന്നേ ഇൻസ്റ്റഗ്രാം ലൈവ് വിഡിയോയിൽ ഒന്നിച്ചെത്തി മലയാളത്തിന്റെ മമ്മൂട്ടിയും മോഹൻലാലും. ‘പാട്രിയേറ്റ്’ സിനിമയുടെ പ്രതീക്ഷകൾ പറഞ്ഞു വർത്തമാനം തുടങ്ങിയ ഇരുവരുടെയും ഇടയിലേക്ക് സിനിമയിലെ മറ്റൊരു താരമായ ചാക്കോച്ചനുമെത്തിയതോടെ ചാറ്റ് കൂടുതൽ രസകരമായി. ചാക്കോച്ചനെ കാണുമ്പോൾ ബോബൻ എന്നു വിളിച്ചുപോകുന്ന മോഹൻലാൽ ഇത്തവണയും പതിവു തെറ്റിച്ചില്ല. ആദ്യം ചാക്കോച്ചൻ എന്നു വിളിച്ചു തുടങ്ങിയെങ്കിലും അത് പിന്നീട് ബോബനായി. കുഞ്ചാക്കോ ബോബൻ എന്നത് അദ്ദേഹത്തിന്റെ അച്ഛന്റെയും അപ്പൂപ്പന്റെയും പേരാണെന്നും സത്യത്തിൽ ഇദ്ദേഹത്തിന് സ്വന്തമായി ഒരുപേരില്ലെന്നും മമ്മൂട്ടിയുടെ കൗണ്ടർ.
മോഹൻലാൽ ന്യൂയോർക്കിൽ നിന്നാണ് സംസാരിച്ചത്. മമ്മൂട്ടിയും കുഞ്ചാക്കോ ബോബനും കേരളത്തിലായിരുന്നു. എല്ലാവരും ചിത്രം തിയറ്ററിൽ പോയി കാണുമെന്ന് വിഡിയോ കോളിൽ പറഞ്ഞു. താൻ വെള്ളിയാഴ്ച രാവിലെ ചിലപ്പോൾ ദുബായിലേക്ക് പോകുമെന്നും അവിടെ വച്ചാകും ചിത്രം കാണുകയെന്നും മമ്മൂട്ടി പറഞ്ഞു. തനിക്ക് ബെംഗളൂരുവിലേക്ക് പോകേണ്ട ആവശ്യമുണ്ടെന്നും അവിടെ വെച്ച് ചിത്രം കാണുമെന്നും കുഞ്ചാക്കോ ബോബനും വ്യക്തമാക്കി. സിനിമ ന്യൂയോർക്കിൽ കാണാൻ പദ്ധതിയിടുന്നുണ്ടെന്നായിരുന്നു മോഹൻലാലിന്റെ മറുപടി
