വീണാ ജോര്ജ് നല്ലൊരു ആരോഗ്യമന്ത്രി അല്ലെങ്കിലും നല്ലൊരു അഭിനേത്രി ആണെന്ന് തെളിയിച്ചുവെന്ന് കെ.സുധാകരന് എം.പി. കേരളത്തിലെ ആരോഗ്യമന്ത്രിയെ ആക്രമിച്ചുവെന്ന തരത്തില് സിപിഐഎം പ്രചരിപ്പിക്കുന്ന ആരോപണങ്ങള് പൂര്ണമായും അടിസ്ഥാനരഹിതവും സിപിഐഎമ്മിന്റെ രാഷ്ട്രീയ നാടകവുമാണെന്നും അദ്ദേഹം പ്രസ്താവനയില് വ്യക്തമാക്കി
സംഭവവുമായി ബന്ധപ്പെട്ട് കാണിക്കുന്ന ദൃശ്യങ്ങളില് നിന്നെല്ലാം ആക്രമണവും, പരിക്കേറ്റുവെന്ന അവകാശവാദങ്ങളും യഥാര്ത്ഥ സംഭവവികാസങ്ങളുമായി ബന്ധവുമില്ലെന്ന് വ്യക്തമാവുകയാണ്. സംഭവസ്ഥലത്തുണ്ടായിരുന്ന കെഎസ്യു കുട്ടികള് ജനാധിപത്യപരമായ രീതിയില് പ്രതിഷേധിച്ചിട്ടുണ്ട്. കുട്ടികള് മന്ത്രിയെ ആക്രമിച്ചിട്ടില്ലെന്നും, അവരില് നിന്നൊരു അക്രമപ്രവൃത്തി ഉണ്ടായിട്ടില്ലെന്നും ദൃക്സാക്ഷി മൊഴികളും ലഭ്യമായ വിവരങ്ങളും വ്യക്തമായി സൂചിപ്പിക്കുന്നു. കേരളത്തിലെ മൊത്തം ദൃശ്യമാധ്യമങ്ങള് സംഭവ സ്ഥലത്ത് ഉണ്ടായിരുന്നു. ഏതെങ്കിലും ദൃശ്യമാധ്യമങ്ങളില് കെഎസ്യു കുട്ടികള് മന്ത്രിയെ ആക്രമിക്കുന്ന ദൃശ്യം ഉണ്ടോ? സിപിഐഎമ്മിന്റെ കൈരളി ചാനല് അടക്കമുള്ള ചാനലുകള് സംഭവ സ്ഥലത്ത് ഉണ്ടായിരുന്നല്ലോ? ഈ ചാനലുകളില് ഒന്നിലും തന്നെ കെഎസ്യു വിദ്യാര്ത്ഥികള് മന്ത്രിയെ ആക്രമിക്കുന്ന ഒരു ദൃശ്യവും വന്നിട്ടില്ല. അതിനുപകരം പ്രതിഷേധക്കാരോട് അങ്ങോട്ട് ആക്രോശിക്കുന്ന മന്ത്രിയുടെ ദൃശ്യമാണുള്ളത് – കെ.സുധാകരന് എംപി ചൂണ്ടിക്കാട്ടി.
ആരോഗ്യമന്ത്രി വീണാ ജോര്ജിനെ ശാരീരികമായി ആക്രമിച്ചിട്ടില്ലെന്ന് യുഡിഎഫ് കണ്വീനര് അടൂര് പ്രകാശും പ്രതികരിച്ചു. മുന്മുഖ്യമന്ത്രി ഉമ്മന്ചാണ്ടിയെ ആക്രമിച്ചപ്പോള് ഈ ധാര്മികതയൊന്നും കണ്ടില്ലല്ലോ എന്നും സിപിഐഎമ്മിന്റെ ഈ ധാര്മികത തിരഞ്ഞെടുപ്പ് മുന്നില്ക്കണ്ടെന്നും അദ്ദേഹം പറഞ്ഞു
