ചാറ്റ് ജിപിടിക്ക് ഇന്ത്യയിൽ വീടൊരുങ്ങുന്നു; ഈ വർഷാവസാനത്തോടെ ദില്ലിയിൽ ഓഫീസ് തുറക്കാൻ ഓപ്പൺ എഐ

സാം ആൾട്ട്മാൻ നയിക്കുന്ന ബില്യൺ ഡോളർ എ ഐ സ്റ്റാർട്ടപ്പായ ഓപ്പൺ എ ഐ ഇന്ത്യയിലേക്കെത്തുന്നു. ഈ വർഷം അവസാനത്തോടെ ദില്ലിയിൽ പുതിയ ഓഫീസ് തുറക്കുമെന്ന് ലോകത്തെ മുൻനിര നിർമിതബുദ്ധി സംരഭമായ ഓപ്പൺ എഐ അറിയിച്ചു. ഇന്ത്യയുടെ എ ഐ ദൗത്യത്തിന് പിന്തുണ പ്രഖ്യാപിച്ചു കൊണ്ട്, ‘ഇന്ത്യക്കായി, ഇന്ത്യക്കൊപ്പം ചേർന്നുള്ള’ എ ഐ മിഷനാണ് തങ്ങളുടെ ലക്ഷ്യമെന്നും ഇതിന് സർക്കാരിന്‍റെ പിന്തുണയുണ്ടാകുമെന്നും ഓപ്പൺ എ ഐ വാർത്താ കുറിപ്പിൽ പറഞ്ഞു. കമ്പനിയുടെ ആഗോള വികാസത്തിലെ പ്രധാന ചുവടുവെപ്പായാണ് ഇന്ത്യയിലേക്കുള്ള വരവിനെ കാണുന്നതെന്നും അവർ അറിയിച്ചു.ഓപ്പൺ എ ഐയുടെ രണ്ടാമത്തെ വലിയ വിപണിയും, യുഎസിന് തൊട്ടുപിന്നാലെ അതിവേഗം വളരുന്ന വിപണികളിൽ ഒന്നുമാണ് ഇന്ത്യ. കഴിഞ്ഞ വർഷം മാത്രം ഇന്ത്യയിലെ ചാറ്റ് ജിപിടി ഉപയോക്താക്കൾ നാലിരട്ടിയിലധികം വർധിച്ചിരുന്നു. ലോകത്ത് ചാറ്റ് ജിപിടി ഉപയോഗിക്കുന്ന ഏറ്റവും വലിയ വിദ്യാർത്ഥി സമൂഹമുള്ളതും ഇന്ത്യയിലാണ്.ഓപ്പൺ എ ഐയുടെ ഇന്ത്യയിലേക്കുള്ള വരവിൽ താൻ ആവേശഭരിതനാണ് എന്ന് പറഞ്ഞ സാം ആൾട്ട്മാൻ, ഇന്ത്യയിലെ പുതിയ ഓഫീസ് രജിസ്റ്റര്‍ ചെയ്തിട്ടുള്ളതായും നിയമനം ആരംഭിച്ചതായും അറിയിക്കുകയും ചെയ്തു. ഓഫീസ് തുറക്കാനുള്ള ഓപ്പണ്‍എഐയുടെ പ്രഖ്യാപനത്തെ കേന്ദ്രവും സ്വാഗതം ചെയ്തിട്ടുണ്ട്.