എറണാകുളത്ത് പെൺകുട്ടികളും ആൺകുട്ടികളുമടക്കം 35 വിദ്യാർത്ഥികൾ ആശുപത്രിയിൽ, രോഗകാരണം വ്യക്തമല്ല

കൊച്ചി: വയറിളക്കവും ഛർദ്ദിയും അനുഭവപ്പെട്ടതിനെത്തുടർന്ന് 35 വിദ്യാർത്ഥികൾ ആശുപത്രിയിൽ. എറണാകുളം തൃക്കാക്കര കെഎംഎം കോളേജ് ഹോസ്റ്റലിലെ താമസക്കാരായ വിദ്യാർത്ഥികളെയാണ് ആശുപത്രിയിൽ പ്രവേശിപ്പിച്ചത്. ആൺകുട്ടികളുടെയും പെൺകുട്ടികളുടെയും ഹോസ്റ്റലിലെ വിദ്യാർത്ഥികൾക്കാണ് രോഗബാധയുണ്ടായത്. 25 പെൺകുട്ടികളെയും 10 ആൺകുട്ടികളെയുമാണ് ആശുപത്രിയിൽ പ്രവേശിപ്പിച്ചിരിക്കുന്നത്. ഭക്ഷ്യവിഷബാധയെന്നാണ് സംശയം. ഹോസ്റ്റൽ ടാങ്കിലെ വെള്ളം മലിനമായിരുന്നു എന്ന വിവരമുണ്ട്. വിവരമറിഞ്ഞതിനെത്തുടർന്ന് ആരോഗ്യവിഭാഗം സ്ഥലത്തെത്തി പരിശോധന നടത്തി. ടാങ്കിലെ വെള്ളത്തിന്റെ സാമ്പിൾ പരിശോധനയ്ക്ക് അയച്ചു. റിപ്പോർട്ട് ലഭിച്ചതിനുശേഷമേ രോഗകാരണം വ്യക്തമാവുകയുള്ളൂവെന്ന് അധികൃതർ അറിയിച്ചു. നിലവിൽ ആരുടെയും നില ഗുരുതരമല്ലെന്നാണ് വിവരം.