വായനയുടെ വിജയജാലകം തുറന്ന് അൽഫലാഹ് വിദ്യാർത്ഥികൾ

കക്കിടിപ്പുറം: അൽഫലാഹ് എ.എം.എം സ്കൂളിൽ വായനവാരാചരണങ്ങളുടെ ഭാഗമായി ഒന്നാം ക്ലാസ്സുമുതൽ പത്താം ക്ലാസ്സുവരെയുള്ള വിദ്യാർത്ഥികൾക്ക് മലയാളം, ഹിന്ദി, ഇംഗ്ലീഷ്, അറബിക് ഭാഷകളിൽ വിവിധ പരിപാടികൾ സംഘടിപ്പിച്ചു. വായനയെ പ്രോത്സാഹിപ്പിക്കുന്നതിലേക്കുള്ള ഈ പ്രവർത്തനങ്ങൾ വിദ്യാർത്ഥികളിൽ വലിയ ഉത്സാഹം സൃഷ്ടിച്ചു.മൂന്നാം ക്ലാസ്സുമുതൽ ആറാം ക്ലാസ്സുവരെയുള്ള വിദ്യാർത്ഥികൾ നളന്ദ വായനശാല സന്ദർശിക്കുകയും പുതിയ വായനാനുഭവം നേടുകയും ചെയ്തു. ഏഴാം ക്ലാസ്സുമുതൽ പത്താം ക്ലാസ്സ്‌ വരെയുള്ള വിദ്യാർത്ഥികൾ വള്ളത്തോൾ വിദ്യാപീഠത്തിലെ ആധുനിക സൗകര്യങ്ങളോടെ ഒരുക്കിയ ഗ്രന്ഥശാല സന്ദർശിച്ചു. സ്കൂളിലെ എല്ലാ ക്ലാസ്സുകളിലെയും കുട്ടികൾ അതാത് ക്ലാസുകളിൽ മനോഹരമായ ക്ലാസ്‌റൂം ലൈബ്രറികൾ ഒരുക്കി, വായനയുടെ പ്രാധാന്യം ഉദ്ഘോഷമാക്കി. ഒരാഴ്ച നീണ്ടു നിന്ന വായനപക്ഷാചരണത്തിന് സ്കൂൾ ലിറ്റററി ക്ലബ്‌ നേതൃത്വം നൽകി.സ്കൂൾ പ്രിൻസിപ്പൽ മുഹമ്മദ് അൻസാർ കെ. ടി, വൈസ് പ്രിൻസിപ്പൽ പ്രിയ ടി.കെ, എം എസ് ഡിപ്പാർട്ട്മെൻ്റ് ഹെഡ് അഷ്കർ അലി എന്നിവർ പരിപാടിക്ക് ആശംസകൾ അറിയിച്ചു.