എമ്പുരാന് 17 മാറ്റങ്ങൾ വരുത്തുമെന്ന് നിർമാതാക്കൾ; പുത്തൻ പതിപ്പ് തിങ്കളാഴ്ച്ച മുതൽ

മോഹൻലാൽ ചിത്രം എമ്പുരാനിലെ വിവാദ ഭാഗങ്ങൾക്ക് വെട്ട്. പതിനേഴിലധികം ഭാഗങ്ങളാണ് കട്ട് ചെയ്ത് ഒഴിവാക്കിയത്. സ്ത്രീകൾക്കെതിരായ അതിക്രമവും കലാപത്തിലെ ചില രംഗങ്ങളും ഉൾപ്പെടെ ഒഴിവാക്കി. പുത്തൻ പതിപ്പ് തിങ്കളാഴ്ച്ച മുതൽ പ്രദർശിപ്പിക്കും.എമ്പുരാൻ സിനിമയ്‌ക്കെതിരെ രൂക്ഷവിമർശനവുമായി ചില സംഘപരിവാർ നേതാക്കളും ആർഎസ്എസ് മുഖപത്രം ഓർഗനൈസറും രംഗത്തെത്തിയിരുന്നു. ചിത്രം അക്രമരംഗങ്ങളിൽ ഹിന്ദു സമുദായത്തെ പ്രതിസ്ഥാനത്ത് നിർത്തുന്നു എന്നാണ് സംഘപരിവാറിന്റെ പ്രധാന ആരോപണം. തിയേറ്ററിൽ എത്തി രണ്ടു ദിവസം പിന്നിട്ടപ്പോൾ തന്നെ മൊത്തം കളക്ഷനിൽ 100 കോടി തൊട്ട ചിത്രത്തിലെ പതിനേഴിലധികം ഭാഗങ്ങൾ വെട്ടിമാറ്റാനാണ് നിർമാതാക്കൾ തീരുമാനിച്ചത്. കലാപത്തിന്റ കൂടുതൽ ദൃശ്യങ്ങൾ, സ്ത്രീകൾക്കെതിരായ ആക്രമണ ദൃശ്യങ്ങൾ എന്നിവയിലും മാറ്റം വരും.ചില രംഗങ്ങൾ മാറ്റാനും ഏതാനും പരാമർശങ്ങൾ മ്യൂട്ട് ചെയ്യാനുമാണ് തീരുമാനം. വില്ലൻ കഥാപാത്രത്തിന്റ പേരും മാറും. ഇത് റീ സെൻസറിങ് അല്ല. പുതിയ പതിപ്പ് തിങ്കളാഴ്ച്ച മുതൽ തിയറ്ററുകളിൽ പ്രദർശിപ്പിക്കും. അതുവരെ നിലവിലെ സിനിമ പ്രദർശനം തുടരും. ശ്രീ ഗോകുലം മൂവീസ്, ആശീർവാദ് സിനിമാസ്, ലൈക്ക പ്രൊഡക്ഷൻസ് എന്നിവയുടെ ബാനറിൽ ഗോകുലം ഗോപാലൻ, ആന്റണി പെരുമ്പാവൂർ, സുഭാസ്കരൻ എന്നിവർ ചേർന്നാണ് ചിത്രം നിർമിച്ചിരിക്കുന്നത്. മുരളി ഗോപിയുടേതാണ് തിരക്കഥ.