ലൈഫ് ഈസ് ബ്യൂട്ടിഫുള്‍: ലഹരിക്കെതിരെ ജനജാഗ്രത സദസ്സുകള്‍

കലാലയങ്ങളിലും പൊതുസമൂഹത്തിലും വര്‍ദ്ധിച്ചു വരുന്ന ലഹരി വിപത്തിനെതിരെ ഉന്നതവിദ്യാഭ്യാസ വകുപ്പ്, സംസ്ഥാന നാഷണല്‍ സര്‍വ്വീസ് സ്‌കീമിന്റെ നേതൃത്വത്തില്‍ പ്രത്യേക ക്യാമ്പയിനിന് തുടക്കം കുറിക്കുകയാണ്. ‘ലൈഫ് ഈസ് ബ്യൂട്ടിഫുള്‍’ (ജീവിതം സുന്ദരമാണ്) എന്ന പേരില്‍ സംസ്ഥാനത്തെ ആയിരം കേന്ദ്രങ്ങളില്‍ എന്‍എസ്എസ് യൂണിറ്റുകള്‍ ‘ലൈഫ് ഈസ് ബ്യൂട്ടിഫുള്‍’ ക്യാമ്പയിന്‍ ഭാഗമായി ലഹരിക്കെതിരെ ജനജാഗ്രത സദസ്സുകള്‍ ഒരുക്കും. സംസ്ഥാനത്തെ 3500 എന്‍ എസ് എസ് യൂണിറ്റുകളും അവയിലെ മൂന്നര ലക്ഷം സന്നദ്ധപ്രവര്‍ത്തകരും ചേര്‍ന്ന്, സ്വന്തം കലാലയങ്ങളുടെ പങ്കാളിത്ത ഗ്രാമങ്ങളില്‍/പട്ടണങ്ങളില്‍ ആണ് ജനജാഗ്രത സദസ്സുകള്‍ ഒരുക്കുക.ജനജാഗ്രത സദസ്സുകളില്‍ പൊതുജന പങ്കാളിത്തത്തോടെ വ്യത്യസ്തമായ ബോധവല്‍ക്കരണ പ്രവര്‍ത്തനങ്ങള്‍ ആവിഷ്‌കരിക്കാനാണ് പദ്ധതിയിട്ടിരിക്കുന്നത്. മാര്‍ച്ച് 17 മുതല്‍ 25 വരെയുള്ള ദിവസങ്ങളിലാണ് ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിന്റെ ഈ ഘട്ടം നടക്കുക. ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിന്റെ സംസ്ഥാനതല ഉദ്ഘാടനം മാര്‍ച്ച് 17ന് ഉച്ചക്ക് രണ്ടു മണിക്ക് തിരുവനന്തപുരം സെന്‍ട്രല്‍ സ്റ്റേഡിയത്തില്‍ ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആര്‍. ബിന്ദു നിര്‍വ്വഹിക്കും.വ്യത്യസ്തങ്ങളായ കര്‍മ്മപരിപാടികളാണ് ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിനായി ഒരുക്കിയിരിക്കുന്നത്:. ലഹരിവിരുദ്ധ മനുഷ്യച്ചങ്ങല. ലഹരിവിരുദ്ധ സംവാദങ്ങള്‍. വാക്കും വരയും: ലഹരിക്കെതിരെ പ്രാദേശിക കലാകാരന്മാരുടെ കൂട്ടായ്മ. ലഹരിവിരുദ്ധ സന്ദേശ മരങ്ങള്‍. ലഹരിക്കെതിരെ മണ്‍ചെരാതുകള്‍ തെളിയിക്കല്‍. ലഹരിവിരുദ്ധ ബഹുജന റാലി. ലഹരിവിരുദ്ധ പ്രതിജ്ഞ. ലഹരിവിരുദ്ധ മാരത്തോണ്‍/കൂട്ടയോട്ടം. തത്സമയ മത്സരങ്ങള്‍. മെഡിക്കല്‍ ക്യാമ്പുകള്‍. ലഹരിക്കെതിരെ മുദ്രാവാക്യ രചന. ലഹരിവിരുദ്ധ റീല്‍ നിര്‍മ്മാണംഇതോടൊപ്പം, സ്‌നേഹാദരം എന്ന പേരില്‍, ലഹരിക്കെതിരെ പ്രവര്‍ത്തിക്കുന്ന ആയിരം സാമൂഹ്യപ്രവര്‍ത്തകരെ/ ഉദ്യോഗസ്ഥരെ ആയിരം കേന്ദ്രങ്ങളിലും കണ്ടെത്തി അവരെ പ്രത്യേകം ആദരിക്കും. ലഹരിമുക്തി നേടിയവരുടെ സംഗമങ്ങളും ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിന്റെ ഭാഗമായി നടക്കും. പൊതു ഇടങ്ങളില്‍ ലഹരിവിരുദ്ധ ഡോക്യുമെന്ററി/സിനിമ പ്രദര്‍ശനങ്ങളും ക്യാമ്പയിനിന്റെ ഭാഗമായി ഒരുക്കും.നാഷണല്‍ സര്‍വ്വീസ് സ്‌കീമിന്റെ തനതു പ്രവര്‍ത്തനങ്ങളിലെ പ്രധാന മേഖലകളിലൊന്നാണ് ലഹരിക്കെതിരായ കര്‍മ്മപരിപാടികള്‍. ഇതിനുവേണ്ടി പ്രത്യേകം രൂപം നല്‍കിയ ലഹരിവിരുദ്ധ കര്‍മ്മസേനയായ ആസാദ് സേനയുടെ പ്രവര്‍ത്തനങ്ങള്‍ ക്യാമ്പസുകളിലും പങ്കാളിത്ത ഗ്രാമങ്ങളിലും സക്രിയമായി മുന്നോട്ടുപോകുന്നുണ്ട്. ‘ലൈഫ് ഈസ് ബ്യൂട്ടിഫുള്‍’ സംസ്ഥാനതല ക്യാമ്പയിനിന്, എന്‍എസ്എസ് യൂണിറ്റുകളിലും പങ്കാളിത്ത ഗ്രാമങ്ങളിലും ലഹരിവിരുദ്ധ ബോധവത്കരണ ക്യാമ്പയിനുകള്‍ മുന്നോട്ടു കൊണ്ടുപോകുന്ന ‘ആസാദ്’ സേന നേതൃത്വം നല്‍കും. ഇതുവഴി ക്യാമ്പസിന്റെയും പങ്കാളിത്തഗ്രാമത്തിന്റെയും കാവലാള്‍ ആയി ഓരോ എന്‍എസ്എസ് ഘടകത്തെയും മാറ്റിത്തീര്‍ക്കാനാണ് ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിലൂടെ ലക്ഷ്യമിടുന്നത്.ജീവിതമാണ് ലഹരിയെന്ന ബോധ്യത്തിലേക്ക് യുവതലമുറയെ കൈപ്പിടിച്ചും പ്രചോദിപ്പിച്ചും നയിക്കാന്‍ ലക്ഷ്യം വെയ്ക്കുന്ന ‘ലൈഫ് ഈസ് ബ്യൂട്ടിഫുള്‍’ ക്യാമ്പയിനിന്റെ സന്ദേശം ഓരോ വിദ്യാര്‍ത്ഥികളിലും കുടുംബങ്ങളിലും എത്തിക്കുന്നതിന് വിപുലമായ തുടര്‍പ്രവര്‍ത്തനങ്ങള്‍ ഉന്നതവിദ്യാഭ്യാസ വകുപ്പില്‍ നിന്നും നാഷണല്‍ സര്‍വ്വീസ് സ്‌കീമില്‍ നിന്നും ഉണ്ടാകും. മാധ്യമങ്ങളുടെ സവിശേഷശ്രദ്ധ ഈ ക്യാമ്പയിനിന് ഉണ്ടാകണമെന്ന് പ്രത്യേകം അഭ്യര്‍ത്ഥിക്കുന്നു.