നല്ലവനായ കള്ളൻ; മോഷ്ടിച്ച 30 പവൻ സ്വർണം തിരിച്ചെത്തിച്ച് കള്ളൻ

കോഴിക്കോട് കാരശ്ശേരിയിലെ വീട്ടില്‍ നിന്ന് സ്വര്‍ണാഭരണങ്ങള്‍ മോഷണം പോയ സംഭവത്തില്‍ ട്വിസ്റ്റ്. പൊലീസ് അന്വേഷണം നടക്കുന്നതിനിടെ സ്വര്‍ണം വീടിന് സമീപത്തെ ബക്കറ്റില്‍ നിന്നും ലഭിച്ചു. പ്രതിയെ ഉടന്‍ പിടികൂടുമെന്ന് പൊലീസ് അറിയിച്ചു. കാരശ്ശേരി കുമാരനെല്ലൂര്‍ സ്വദേശി സെറീനയുടെ വീട്ടിലാണ് കവര്‍ച്ച നടന്നത്. ശനിയാഴ്ച രാത്രി സെറീനയും കുടുംബവും വിവാഹ സത്കാരത്തിനായി ബന്ധുവീട്ടില്‍ പോയിരുന്നു. ഈ സമയത്ത് വീട്ടിലെത്തിയ മോഷ്ടാവ് ഓടിളക്കി അകത്തുകടക്കുകയും അലമാരയ്ക്ക് സമീപത്തുള്ള പെട്ടിയില്‍ നിന്ന് 30 പവന്‍ സ്വര്‍ണവുമായി കടന്നുകളയുകയുമായിരുന്നു. പുലര്‍ച്ചെയോടെയാണ് വീട്ടുകാര്‍ വിവരമറിയുന്നത്. തുടര്‍ന്ന് മുക്കം പൊലീസില്‍ പരാതി നല്‍കി. പൊലീസ് അന്വേഷണം പുരോഗമിക്കുന്നതിനിടയിലാണ് ഇന്ന് രാവിലെ വീടിന് പുറകിലെ അലക്കാനുള്ള വസ്ത്രങ്ങള്‍ സൂക്ഷിച്ച ബക്കറ്റില്‍ നിന്ന് സ്വര്‍ണം ലഭിച്ചത്. പ്രതിയെ ഉടന്‍ പിടികൂടുമെന്ന് മുക്കം എസ് ഐ ശ്രീജിത്ത് എസ് പറഞ്ഞു. 21 പവന്‍ തൂക്കം വരുന്ന 20 ഇനം സ്വാര്‍ണാഭരണങ്ങളാണ് ബക്കറ്റില്‍ നിന്നും കണ്ടെത്തിയത്. ഒരു ആഭരണം ഇനിയും കണ്ടെത്താനുണ്ട്. ബന്ധുവായ ഒരാളാണ് മോഷണത്തിന് പിന്നില്‍ എന്ന് സംശയിക്കുന്നതായി വീട്ടുകാര്‍ നല്‍കിയ പരാതിയില്‍ ഉണ്ട്.