മലപ്പുറത്ത് ഫുട്ബോൾ ഗ്രൗണ്ടിലെ അപകടത്തിൽ അനുമതിയില്ലാതെ പടക്കം പൊട്ടിച്ചതിന് സംഘാടകർക്കെതിരെ കേസ്

മലപ്പുറം: അരീക്കോട് തെരട്ടമ്മലിൽ സെവെൻസ് ഫുട്ബാൾ മത്സരത്തിനിടെ അപകടമുണ്ടായതിൽ സംഘാടകർക്കെതിരെ പൊലീസ് കേസെടുത്തു. അനുമതിയില്ലാതെ കരിമരുന്ന് പ്രയോ​ഗിച്ചതിനും പടക്കം പൊട്ടിച്ചതിനുമാണ് കേസ് രജിസ്റ്റർ ചെയ്തത്. കഴിഞ്ഞ ദിവസമായിരുന്നു മപ്പുറത്ത് സെവന്‍സ് ഫുട്‌ബോള്‍ ഫൈനല്‍ മത്സരത്തിനിടെ വെടിക്കെട്ട് അപകടം നടന്നത്.മത്സരത്തിന് മുൻപ് നടത്തിയ കരിമരുന്ന് പ്രയോ​ഗത്തിനിടെ പടക്കം കാണികൾക്കിടയിലേക്ക് പൊട്ടിത്തെറിച്ച് വീഴുകയായിരുന്നു. സംഭവത്തിൽ 25-ഓളം പേർക്ക് പരിക്കേറ്റു. ഇവരെ ഉടൻ തന്നെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. ഇതിൽ മൂന്നു പേർക്ക് സാരമായി പൊള്ളലേറ്റിരുന്നു. മറ്റ് ആരുടെയും പരിക്ക് ​ഗുരുതരമല്ല.പടക്കത്തിന്റെ ബോക്സ് മറിഞ്ഞതാണ് അപകടത്തിന് കാരണമായതെന്നാണ് പ്രാഥമിക വിവരം. കൂടുതലായി നടത്തിയ അന്വേഷണത്തിലാണ് അനുമതിയില്ലാതെ കരിമരുന്ന് പ്രയോ​ഗിച്ചതിനും പടക്കം പൊട്ടിച്ചതിനും സംഘാടകർക്കെതിരെ കേസ് രജിസ്റ്റർ ചെയ്തത്. യുണൈറ്റഡ് എഫ്.സി നെല്ലിക്കുത്തും കെ.എം.ജി മാവൂരും തമ്മിലായിരുന്നു ഇന്നലത്തെ ഫൈനല്‍മത്സരം. ഗാലറിയും കവിയുന്ന തരത്തിൽ കാണികൾ എത്തിയിരുന്നു. ചൈനീസ് പടക്കമാണ് പൊട്ടിച്ചതെന്ന് പൊലീസ് ഇന്നലെ അറിയിച്ചിരുന്നു.