മാലിന്യ മുക്തം നവകേരളം; തൃത്താലയിലെ കൂറ്റനാട് ഹരിത പട്ടണം ആയി പ്രഖ്യാപിച്ചു

മാലിന്യ മുക്തം നവകേരളം ക്യാമ്പയിനിന്റെ ഭാഗമായി ജനുവരി 26 മുതൽ 31 വരെ കേരളത്തിലെ വിവിധയിടങ്ങളിൽ ഹരിത പ്രഖ്യാപനങ്ങൾ നടക്കുന്നതിന്റെ ഭാഗമായി തൃത്താലയിലെ കൂറ്റനാട് ഹരിത പട്ടണം ആയി പ്രഖ്യാപിച്ചുവെന്ന് മന്ത്രി എം ബി രാജേഷ്. ശുചീകരണ തൊഴിലാളികൾ നഗരം പൂർണ്ണമായും വൃത്തിയാക്കിയിട്ടുണ്ട് എന്നും തുടർന്നും വൃത്തിയായി സൂക്ഷിക്കുന്നതിന് ബിന്നുകൾ സ്ഥാപിക്കുകയും തൊഴിലാളികളെ വിന്യസിക്കുകയും ചെയ്തിട്ടുണ്ട് എന്നും മന്ത്രി പങ്കുവെച്ച പോസ്റ്റിൽ പറഞ്ഞു.വഴിയോരങ്ങളിലും പൊതു നിരത്തുകളിലും പാഴ് വസ്തുക്കൾ വലിച്ചെറിയുന്നവർക്കെതിരെ കർശനമായ നിയമ നടപടികളും ആരംഭിച്ചിട്ടുണ്ട് എന്നും അദ്ദേഹം വ്യക്തമാക്കി. കൂറ്റനാട് ടൗണിനെ ഹരിത പട്ടണം ആയി പ്രഖ്യാപിക്കുന്നതിന് നേതൃത്വം നൽകിയ ഗ്രാമപഞ്ചായത്ത് ടീമംഗങ്ങളെ മന്ത്രി അഭിനന്ദിച്ചു. ഈ കൊച്ചു പട്ടണത്തെ വൃത്തിയായും മനോഹരമായും സൂക്ഷിക്കേണ്ടത് നമ്മൾ ഓരോരുത്തരുമാണ് എന്നും മന്ത്രി പറഞ്ഞു.